मलेसिया, असार १७ ।
अवैधानिक कामदारलाई समयमै नेपाल फर्किन नेपाली दूतावास मलेसियाले आग्रह गरेको छ । अवैधानिक कामदार बैधानिक बन्ने समय सकिएकाले प्रहरीले पक्राउ गरे समस्या हुने भन्दै दूतावासले समयमै फर्किन आग्रह गरेको हो ।
मलेसिया सरकारले अबैधानिक कामदारलाई आजदेखि खोजेर पक्राउ गर्ने बताइसकेको छ । मलेसिया सरकारले अवैधानिक कामदार र रोजगारदातालाई विवरणसहित दर्ता प्रक्रियामा आउन सन् २०१६ देखी भन्दै आएको थियो ।
वैधानिक बन्न दिएको समयमा दर्ता प्रक्रियामा छुटेका र नआएका अवैधानिक विदेशी कामदारलाई अब स्वदेश फर्किनुको विकल्प नरहेको र दोषी कामदार र रोजगारदातालाई ५० हजार रिंगिट वा ५ बर्ष जेल अथवा दुबै सजाय पनि हुन सक्ने मलेसियाको अध्यागमनका निर्देशक मुस्ताफिर अलिको भनाइ उदृत गर्दै स्थानीय सञ्चारमाध्यमले जनाएका छन् ।
२०१६ फेब्रुअरीदेखि सुरु भएको अवैधानिक कामदारलाई वैधानिक बन्ने प्रक्रिया हिजो देखि सकिएको छ । वैधानिक बन्ने समयसिमा सकिए पनि स्वदेश फर्किनलाई भने २०१८ को अगस्ट ३० सम्मको समय दिइएको छ ।
नेपाली दूतावास मलेसियाले पनि समय अघिनै स्वदेश फर्किन अवैधानिक रुपमा बसिरहेका नेपाली कामदारलाई बारम्बार आग्रह गर्दै आएको छ ।
