३ असार, सप्तरी । २ नं. प्रदेश सरकारले मुस्लिम धर्माबलम्बीको मुख्य पर्व इदको अवसरमा सार्वजनिक विदा दिए पनि सरकारी कार्यालयले नै अवज्ञा गरेका छन् । इदको अवसर पारेर आइतबार प्रदेश २ मा सार्वजनिक विदा दिए पनि कतिपय सरकारी कार्यालय नै सञ्चालनमा अाए ।
सप्तरी सदरमुकाम राजविराजमा रहेकेा उच्च अदालत जनकपुरको राजविराज इजलास, सप्तरी जिल्ला अदालत, सरकारी वकिलको कार्यालयका साथै राष्ट्रिय वाणिज्य बैंक, नेपाल बैंक लिमिटेड आइतबार खुला रहृयो । यसबाहेक निजी क्षेत्रका बैंकहरु समेत सञ्चालन भएको छ ।
प्रदेश सरकारले गरेको निर्णयबारे माथिल्लो निकायले कुनै जानकारी नगराउँदा कार्यालय सञ्चालन गरेको कर्मचारीहरुले बताएका छन् ।यद्यपि जिल्ला प्रशासन कार्यालयलगायतका अन्य सरकारी तथा गैरसरकारी कार्यालयहरु भने बन्द रह्यो ।
मुस्लिम धर्माबलम्बीको ठूलो पर्व इदका लागि भन्दै प्रदेश सरकारले आइतबार विदा दिने निर्णय गरेको थियो । विदा दिने निर्णय गरे पनि सरकारी कार्यालयहरु नै खुल्नु सरकारी निर्णयको अवमूल्यन भएको प्रदेश २ का भूमि व्यवस्था, कृषि तथा सहकारी मन्त्री शैलेन्द्र साहले बताए ।
केन्द्र सरकारले इद पर्वको विदा कटौती गरेको छ । तर त्यसको विरोध भइरहेका बेला प्रदेश २ सरकारले भने विदा दिएको हो ।
