कठमाडाैं, ३ असार । नयाँ शक्ति पार्टी, नेपालका संयोजक बाबुराम भट्टराई र लेखक खगेन्द्र संग्रौलाबीच सामाजिक सञ्जालमा नै घम्साघम्सी परेको छ ।
सामाजिक संजाल ट्वीटरमा खगेन्द्रले बाबुरामलाई झटारो हान्दै बाबुरामले सपनामा पत्रकारलाई पूर्वविशिष्टले लिने सुविधा म लिन्न भनेको तर विपनामा प्रधानमन्त्री हुँदा आफैले प्रस्ताव गरेको सुविधान नलिन नैतिकताले दिँदैन भन्ने जवाफ दिएको भन्दै व्यंग्य गरेका थिए ।
त्यसको जवाफमा बाबुरामले खगेन्द्रलाइ ‘जेष्ठ ब्रो’ बाबुरामले यस्ताे जवाफ दिए, ‘फुटपाथमा सुतिरहेको एउटा तन्नमलाई यस्तो व्यग्यवाण किन ? योत जो होचो उसको मुखमा घोचो भएन र ? मेरो प्स्ताव त आफ्नै आवास नहुनेलाई राज्यले सहुलियत भाडामा आवास उपलब्ध गराउनुपर्छ भन्ने हो । सुरक्षाकर्मीलाई मैले पहिल्यै फिर्ता गरिसकेको छु, राज्यबाट अरु कुनै सुविधा लिएको छैन ।’
खगेन्द्रकै थेगो प्रयाेग गरेर बाबुरामले त्यस्ताे जवाफ दिएपछि पुन खगेन्द्रले यस्ताे लेखे, ‘सेठ र ठगहरुको एकाधिकार रहेको राजनीतिमा आवास नहुने तन्नमलाई पूर्वविशिष्ट भन्ने शौभाग्य नै कहाँ जुर्छ र डा. साब ? मेलै त एकजना बाबुरामले म यो सुविधा लिन्न भनिदिए अरु अरु खानका कालहरुलाई लाज लाग्थ्यो कि भनेर कुरिकुरी गर्या हु डा. साब । जसमाथि थोरै आश छ उसलाई नै यसो भनिन्छ ।’ त्यसपछि भने बाबुरामले कुनै जवाफ दिएका छैनन् ।
