काठमाडौँ जेठ २४ ।
संघीय समाजवादी फोरम, नेपालले नेपाल कम्युनिस्ट पार्टी (नेकपा)सँग तत्काल एकीकरणको सम्भावना नरहेको स्पष्ट पारेको छ ।
सञ्चारमाध्यम र सामाजिक सञ्जालमा फोरम र नेकपाबीच पार्टी एकीकरण हुन लागेको समाचार सार्वजनिक भएपछि फोरम अध्यक्षसमेत रहेका उपप्रधानमन्त्री एवं स्वास्थ्यमन्त्री उपेन्द्र यादवले आज विज्ञप्ती जारी गर्दै तत्काल एकता सम्भव नभएको बताउनु भएको हो ।
वैशाख २१ गते बसेको फोरमको केन्द्रीय कार्यसमितिको बैठकले नीति, सिद्धान्त र विचार मिल्ने दलरपार्टीसँग एकीकरण गर्न सकिने निर्णय गरेको थियो । तर, यसबीच फोरम र नेकपाबीच एकीकरणको सन्दर्भमा तत्काल कुनै पनि सम्भावना नरहेको यादवको भनाइ छ ।
जनतामा भ्रम सिर्जना हुनेगरी प्रचार भएकोमा असन्तुष्टि जनाउँदै अध्यक्ष यादवले प्रायोजित एवं निराधार समाचारहरुमा कुनै सत्यता नरहेको उल्लेख गरेका छन् ।
यसअघि (नेकपा) का अध्यक्ष प्रचण्डले पनि सार्ववजनिक कार्यक्रममा नै फोरमसँग एकता हुने बताउनु भएको थियो ।
