१९ जेठ, पोखरा ।
पुनर्गठित नेपाल कम्युनिस्ट पार्टी (नेकपा)का अध्यक्ष पुस्पकमल दाहालले सबैलाई झुक्याएर केपी ओली र आफुले पार्टी एकता गरेको बताउनु भएको छ ।
आफ्नो जन्मस्थल कास्कीको अन्नपूर्ण गाउँपालिकामा आयोजित कार्यक्रममा प्रचण्डले देशभित्रका जाली फटाहा र विदेशी प्रतिक्रियावादीलाई झुक्याएर ड्याम्मै पार्टी एकता गर्नुपरेको बताउनु भयो ।
ओली र आफ्नो योजनामा नै एकता हुँदैन कि भन्ने भ्रम छरेका थियौ र पछि एकैपटक पार्टी एकता गरेर सबैलाई चकित बनाईदियौ प्रचण्डले भन्नुभयो ।
पार्टी एकता हुन लाग्दा भाँड्ने चलखेल भएकाले हुँदैन जस्तो वातावरण बनाएर जाली फटाहालाई झुक्याइएको उहाँको भनाई छ ।
ओली र आफूले सल्लाह गरेरै पार्टी एकतामा बेला बेला दरार देखाएको पनि उहाँले बताउनु भयो ।
उहाँले सरकारको नीति तथा कार्यक्रम ल्याउनुअघि एउटै पार्टी बनाउने सल्लाह अनुसार जेठ ३ गते आफ्नै प्रस्तावमा एकीकरण भएको बताउनु भयो ।
उहाँले भन्नुभयो, जेठ २ गते विहान कमरेड केपी ओली र म बालुवाटारमा भेट भइसकेपछि अब ढिलो नगर्ने कुरा भयो । ओली कमरेडले ७ गते अघिनै गरौं भन्नुभयो । मैले भोलि मदन आश्रति स्मृति दिवसकैदिन गरौं भन्ने प्रस्ताव राखेँ, त्यही दिन भयो ।
उहाँले नेकपाका कार्यकर्तालाई गुटबन्दी गर्ने छुट नरहेको समेत चेतावनी दिनुभयो ।
प्रचण्डले उपेन्द्र यादव समेत सरकारमा सहभागी भएपछि अब सरकारसँग दुई तिहाई बहुमत रहेको र संविधान संशोधनका लागि प्राबिधिक तथा संवैधानिक हैसियत प्राप्त भएको बताउनु भयो ।
