काठमाडौं, जेठ १४ ।
नेपाल कम्युनिस्ट पार्टी र संघीय समाजवादी फोरमबीच दुईबुँदे सहमति भएको छ । सहमति भए सँगै उपेन्द्र यादव नेतृत्वको फोरम सरकारमा सहभागी हुने भएको छ ।
आज बालुवाटारमा भएको बैठकमा प्रधानमन्त्री एवं नेकपाका अध्यक्ष केपी शर्मा ओली, अध्यक्ष प्रचण्ड र फोरम अध्यक्ष उपेन्द्र यादवले दुईबुँदे सहमतिमा हस्ताक्षर गर्नू भएको हो ।
सत्तारुढ नेकपाले आपसी सहमतिका आधारमा संविधान संशोधन गरि अघि बढ्ने लिखित सहमति गरे सँगै फोरम सरकारमा सहभागी हुन लागेको हो ।
‘फोरमले आन्दोलनका क्रममा उठाएका माग र मुद्दाहरुका सम्बन्धमा संविधान संशोधनसँग सम्बन्धित विषयहरु देश र जनताको पक्षमा आपसी सहमतीका आधारमा संविधान संशोधन गरी सम्बोधन गरिन सहमतिको पहिलो बुँदामा भनिएको छ ।
यसैबीच केन्द्रिय सरकारमा सहभागी हुने निर्णयले निर्वाचनदेखि सुरु भएको राजपा र फोरमबीचको गठबन्धन संकटमा परेको हो ।
दुई पार्टीबीच प्रदेश नम्बर दुईमा रहेको गठबन्धन समेत टुटेको छ । यद्यपि मन्त्रालय बाँडफाडको बिषय भने टुंगो लाग्न बाँकी रहेको प्रधानमन्त्रीका प्रेस संयोजक चेतन अधिकारीले जानकारी दिनुभयो ।
सरकार गठनका समय गत फागुन पहिलो साता नै सरकारमा सहभागी हुने तयारी फोरमले गरेपनि उपप्रधानमन्त्री सहितको मागमा सहमति हुन नसकेपछि रोकिएको थियो ।
