५ जेठ, काठमाडौं । प्रधानमन्त्री केपी शर्मा ओलीले विराटनगरमा रहेको भारतीय दुतावासको सम्पर्क कार्यालय हट्ने बताउनु भएको छ ।
पूनर्गठित नेकपा अण्डरलाईनको संसदीय दलको बैठकलाई सम्बोधन गर्दै प्रधानमन्त्री ओलीले १९५० को सन्धि फेर्न भारत सहमत भइसकेको भन्दै विराटनगर १३ स्थित मलाया रोडमा रहेको भारतीय फिल्ड अफिस हट्ने बताउनु भयो ।
२०६५ सालमा कोशी बाँध फुटेको बेला बाँध बनाउँने भन्दै विराटनगरमा स्थापना गरिएको भारतीय दुतावासको सम्पर्क कार्यालयले अहिलेसम्म हटेको छैन ।
बिगत लामो समयदेखि विप्लव नेतृत्वको नेपाल कम्युनिष्ट पार्टीले उक्त कार्यलयले जाशुसीको काम गरेर नेपालको राजनीतिक र आर्थिक मामिलामा हस्तक्षेप गरिरहेकाले तुरुन्त हटाउनु पर्ने माग गर्दै आएको छ ।
नारायणकाजी श्रेष्ठ परराष्ट्रमन्त्री भएको बेला उहाँले पनि फिल्ड अफिस बन्द गर्न पत्र काट्नुभएको थियो । तर, भारतले उक्त पत्रको जवाफ दिएको छैन भने कार्यलय पनि यथावत रहेको छ ।
यसअघि उक्त कार्यलयमा अज्ञात समुहले बम बिस्फोट पनि गराएको थियो ।
बैठकमा बोल्दै नाकाबन्दी अस्वीकार गरेर भारतलाई एक खालको सहमतिमा ल्याएको भन्दै ओलीले राष्ट्रिय हितबाहेक आफ्ना अरु कुनै स्वार्थ नभएको पनि बताउनु भयो ।
