काठमाडौँ, ३ जेठ ।
नेकपा एमाले र नेकपा माओवादी केन्द्रले पार्टी एकता गरेका छन् । कम्युनिष्ट पार्टीको व्यानरमा फरक धारको राजनीति गर्दै आएका एमाले र माओवादी केन्द्र सात महिना लामो छलफल र बहसपछि एक भएका हुन् ।
यो सँगै नेकपा एमाले र माओवादी केन्द्र विघटन भएको छ । एकिकृत पार्टीको नाम नेपाल कम्युनिष्ट पार्टी राखिएको छ । सामूहिक रुपमा सपथ ग्रहण गर्दै ४४१ सदस्यीय नेपाल कम्युनिष्ट पार्टीको घोषणा भएको हो ।
आजै नयाँ पार्टी दर्ताका लागि नेता सुवास नेम्वाङ र देव गुरुङ निर्वाचन आयोगमा जाने तयारी छ ।
एकिकृत पार्टीको नेतृत्व केपी ओली र पुष्पकमल दाहालले गर्नेछन् । एकतापछि पार्टीको नौ सदस्यीय सचिवालय बन्ने भएको छ । सचिवालयमा दुई अध्यक्ष सहित माधव नेपाल र झलनाथ खनाल वरिष्ठ नेताको रुपमा रहनुहुनेछ । त्यसबाहेक नारायणकाजी श्रेष्ठ, इश्वर पोखरेल, रामबहादुर थापा र विष्णु पौडेललाई सचिवालयमा राखिएको छ ।
पार्टीको प्रवक्ता जिम्मेवारी श्रेष्ठलाई दिइएको छ । पार्टीको महासचिव पौडेल हुनुहुनेछ ।
सचिवालयले पार्टीका पोलिटब्युरो, जनवर्गीय संगठन लगायतको एकता र व्यवस्थापन गर्ने जनाईएको छ ।
यस्तै एकीकृत पार्टीको केन्द्रीय कमिटी ४४१ सदस्यीय हुने तय भएको छ । जसमा माओवादी केन्द्रले ४५ प्रतिशत पाएको छ । एमालेबाट २४१ र २०० जना माओवादी केन्द्रबाट केन्द्रिय सदस्य बन्नेछन् ।
यस्तै पोलिटब्यूरो भने तत्काल बन्ने छैन । स्थायी कमिटी ४३ सदस्यीय बनाउने सहमति जुटेको छ । नेताहरुकाअनुसार स्थायी कमिटीमा एमालेबाट २५ र माओवादी केन्द्रबाट १८ जना हुनेछन् ।
एकतापछि पार्टीको चुनाव चिह्न सूर्य रहनेछ भने निर्देशक सिद्धान्त ‘मार्स्वाद–लेलिनवाद’ हुनेछ । राजनीतिक कार्य्दिशा ‘समाजवादउन्मुख समावेशी लोकतन्त्र’ छ ।
एमालेले भन्दै आएको जनताको बहुदलीय जनवाद र माओवादीले भन्ने गरेको २१औं शताब्दीको बहुदलीय जनवादलगायतका वैचारिक मान्यतामा छलफल गर्दै जाने सहमति पनि दुई दलबीच भएको छ ।
यसअघि वाम एकता संयोजन समितिको आजको बैठकले पार्टी एकताको निर्णय गरेको थियो । त्यसपछि दुवै दलको केन्द्रीय समितिले निर्णय अनुमोदन गर्दै आ आफ्नो केन्द्रीय समिति भंग गरेका थिए ।
त्यसलगत्तै प्रधानमन्त्री निवास बालुवाटारमा बसेको एकीकृत पार्टीको पहिलो बैठकमा नै केन्द्रीय सदस्यहरुले नयाँ पार्टीको सदस्यको रुपमा सपथ पत्रमा हस्ताक्षर गरेपछि सपथ ग्रहण गरेका थिए ।
कुनै समय एक अर्कालाई सिध्याउने सम्मको टकरावमा रहेका दुई दल पछिल्लो चुनावी गठबन्धनबाट अन्तमा पार्टी एकता नै गरेका हुन् ।
- एमाले अध्यक्ष केपी ओली र माओवादी अध्यक्ष पुष्पकमल दाहालले पार्टीको नेतृत्व गर्ने। दुई अध्यक्षात्मक प्रणाली अपनाइने। दुवै नेता पार्टीका निर्णय उत्तिकै शक्तिशाली
- नौ सदस्यीय सचिवालय रहने। सचिवालयमा दुई अध्यक्ष सहित माधव नेपाल र झलनाथ खनाल वरिष्ठ नेताको रुपमा रहने छन्। त्यसबाहेक नारायणकाजी श्रेष्ठ, इश्वर पोखरेल, रामबहादुर थापा र विष्णु पौडेल सचिवालयमा रहनेछन्। पार्टीको प्रवक्ता जिम्मेवारी श्रेष्ठालाई दिइएको छ। पार्टीको महासचिव पौडेल हुनेछन्।
- सचिवालयले पार्टीका पोलिटब्युरो, जनवर्गीय संगठन लगायतको एकता र व्यवस्थापन गर्ने
- केन्द्रीय समिति ४४१ र स्थायी समिति ४५ सदस्यीय हुने।
- मार्क्सवाद लेनिनवाद पार्टीका मार्गदर्शक सिद्धान्त हुने। एक्काइसौ शताब्दीको जनवाद, माओवादी लगायतका सिद्धान्तमा महाधिवेशनसम्म छलफल चलाउँदै जाने।
