काठमाडौ २९ वैशाख ।
भारतीय प्रधानमन्त्री नरेन्द्र मोदीको भ्रमणका क्रममा सरकारले गरेको राष्ट्रघातको विरोधमा नेपाल कम्युनिष्ट पार्टीले भोली नेपाल बन्दको आह्वान गरेको छ ।
नेकपाका महासचिव नेत्रविक्रम चन्द विप्लवले आज विज्ञप्ती जारी गर्दै मोदीको भ्रमणका क्रममा सरकारले गरेको राष्ट्रघातले नेपाली जनताको स्वाभिमानमा पारेको चोटको प्रतिरोध स्वरुप नेपाल बन्दको आह्वान गरेको बताउनु भयो ।
मोदीको भ्रमणका क्रममा केपी ओली सरकारले गरेको राष्ट्रघात, नेपाली जनताको स्वाभिमानमा पारेको चोटको प्रतिरोध गर्नुपर्ने अनिवार्यता ठान्दै हाम्रो पार्टीले नेपाल बन्दको घोषणा गरेका छौं, महासचिव विप्लवद्धारा जारी विज्ञप्तीमा उल्लेख गरिएको छ ।
उहाँले लम्पसारवादी सरकार र भारतीय साम्राज्यवादी सरकारकारबीचमा भएको सन्धी, सम्झौता, मोदीको नेपाल भ्रमणका क्रममा नेपाली जनतामाथि गरिएको दमनको भत्र्साना समेत गर्नुभएको छ ।
साथै उहाँले भारतीय प्रधानमन्त्री मोदीको भ्रमणका क्रममा भएको अरुण तेस्रो जलविद्युत परियोजनाको शिलान्यास, मोदीको सिधै जनकपूर आगमन, भ्रमणको सुरक्षाका नाममा भारतीय सेनाको नेपाल प्रवेश, हतियार र अत्याधुनिक सैन्य हेलिकप्टर नेपाल आउनु लगायतका घटनाले नेपाली राष्ट्रियतामाथि गम्भिर आघात पुगेको उल्लेख गर्नुभएको छ ।
यसैबीच भारतीय प्रधानमन्त्री नेपाल भ्रमणमा आएकै दिन नेपाल कम्युनिस्ट पार्टीले उपत्यकामा व्यापक पर्चा वितरण गरेको छ ।
राजधानीको अति व्यस्त चोक कलंकी, बाजालु, चाबहिल, नयाँ बानेश्वर, कोटेश्वर, बागबजार, रत्नपार्क लगायतका विभिन्न स्थानमा दशौं हजार पर्चा वितरण गरिएको नेकपा स्रोतले जनाएको छ । यस्तै उपत्यकाका थुप्रै कलेजहरुमा समेत पर्चा वितरण गरिएको छ ।
जनताको नाममा सम्बोधन गरिएको उक्त पर्चामा नेपाली सेना र यहाँको सुरक्षा निकायमाथि हस्तक्षेप गर्दै भारतीय सेनालाई परेड खेलाउदा नेपालको सार्वभौम सत्तामाथि ठाडो हस्तक्षेप भएको कुरामा जोड दिइएको छ ।
