काठमाडौं, वैशाख २७ ।
राष्ट्रियसभा सदस्यहरुले भोलीदेखि हुन लागेको भारतीय प्रधानमन्त्री नरेन्द्र मोदीको नेपाल भ्रमण, सुरक्षा संवेदनशीलता र सिमा सुरक्षाका बारेमा सरकारको ध्यानाकर्षण गराएका छन् ।
राष्ट्रियसभाको आजको बैठकमा विशेष समय लिएर बोल्दै सदस्यहरुले मोदीको सुरक्षाका लागि भन्दै नेपाल आएको ठूलो संख्याको भारतीय सुरक्षाकर्मीको आवश्यकता, सीमा सुरक्षालगायतमा सरकारको ध्यानाकर्षण गराएका हुन् ।
राष्ट्रियसभा सदस्य उदया शर्मा पौडेलले भारतीय प्रधानमन्त्री नेपाल आउँदा ठूलो संख्यामा नेपालमा भारतीय सुरक्षाकर्मी भित्रिँदा सुरक्षामा चुनौती भएको बताउनुभयो ।
उहाँले भन्नुभयो, ‘के हामीले भारतीय प्रधानमन्त्री र उहाँसँगै आउने पाहुनालाई सुरक्षाको प्रत्याभुति दिन सक्दैनौँ ?’
राष्ट्रियसभा सदस्य विनादेवी रानाले भारतीय दुतावासलाई नेपालमा ५ करोड रुपैयाँ सम्मको योजना सञ्चालनका लागि खर्च गर्न सक्ने अधिकार दिएको भन्दै उहाँले वर्तमान सरकारको राष्ट्रवाद प्रति प्रश्न गर्नुभयो ।
