पोखरा, वैशाख २२ ।
माओवादी केन्द्रका अध्यक्ष पुष्पकमल दाहालले पद भन्दा ठुलो नेकपा एमालेसँग पार्टी एकता भएकाले यसको बिरोध नगर्न आग्रह गर्नुभएको छ ।
माओवादी केन्द्र कास्कीका कार्यकर्ताहरुलाई आज गोप्यरुपमा प्रशिक्षण दिँदै उहाँले एमालेसँग एकताका लागि आफूले बिट मारिसकेको बताउनु भयो ।
उहाँले पार्टी एकताका लागि माओवादी केन्द्र लचिलो भएर प्रस्तुत् भएको जानकारी दिदै पार्टीको निर्णयप्रति प्रतिबद्ध भएर लाग्न कार्यकर्तालाई निर्देशन दिनुभयो ।
उहाँले धेरैको पद खोसिनसक्ने संकेत गर्दै त्यसलाई पनि समान्यरुपमा लिन निर्देशन दिनुभयो ।
कार्यकर्तालाई आश्वासन दिँदै उहाँले भन्नुभयो –‘पार्टी एकता कसरी गर्ने, तपाइँहरुको के स्थान हुने भन्ने कुरा मैले मिलाएको छु ।’
अध्यक्ष दाहालले आजै आफ्नो जन्मस्थान ढिकुरपोखरीस्थित ल्याडेमा आफन्तहरुसँग भेटघाटसमेत गर्नुभयो ।
उहाँ पोखरामा बस्ने भनिएपनि पार्टी एकताका लागि एमालेसँग छलफलका लागि आजै काठमाडौं फर्कने कार्यक्रम रहेको छ ।
