बारा, वैशाख १२ ।
गृहमन्त्री रामबहादुर थापाले २ नम्बर प्रदेश संवेदनशील प्रदेश भएकाले त्यसैअनुसार सुरक्षा रणनीति बनाएर अघि बढ्ने बताउनु भएको छ ।
२ नम्बर प्रदेशस्तरीय सुरक्षा गोष्ठीको आज सिमरामा उद्घाटन गर्दै गृहमन्त्री थापाले अरु प्रदेशको तुलनामा २ नम्बर प्रदेशको सुरक्षा अवस्था चुनौतीपूर्ण रहेकाले गम्भीरताका साथ अघि बढ्नुपर्ने बताउनु भएको हो ।
खुला सिमाना, अपराध, तस्करी, सामाजिक हिंसा, भ्रष्टाचार, प्राकृतिक विपद्जस्ता समस्या २ नम्बर प्रदेशमा बढी देखिएको भन्दै उहाले सुरक्षा गोष्ठीको सुरुआत पनि यसै प्रदेशबाट गरिएको बताउनु भयो ।
गोष्ठीले २ नम्बर प्रदेशको अपराध नियन्त्रण, जनताको सुरक्षा र सेवाको विषयमा कार्ययोजनासहितको निष्कर्ष निकाल्ने बताइएको छ । यसअघि, आजै सिमरा विमानस्थलमा पत्रकारहरुसँग गृहमन्त्री थापाले भूमिगत भएर तराईमा आपराधिक गतिविधि गर्नेले उन्मुक्ति नपाउने चेतावनी दिनुभएको छ ।
तराईमा हुने अपराधिक घटनाप्रति सरकार गम्भीर रहेको उहाको भनाइ थियो ।
