काठमाडौं, पौष २५ ।
प्रदेश तथा प्रतिनिधी सभा सदस्य निर्वाचन पछि पहिलो पटक आज वाम एकता संयोजन समितिको बैठक बसिरहेको छ ।
भक्तपुरको बालकोट स्थित एमाले अध्यक्ष केपी शर्मा ओलीको निवासमा जारी बैठकबाट पार्टी एकीकरणको बारेमा ठोस प्रस्ताव सहित छलफल गर्ने तयारी भएको नेताहरुले बताएका छन् ।
यस अघि हिजो वाम एकता र सत्ता समिकरणका विषयमा नेकपा एमाले र माओवादी केन्द्रले छुट्टा छुट्टै रुपमा छलफल गरेका थिए ।
आजको बैठकमा विशेष गरि एकताका लागि छुट्टै कार्यदल, एकीकृत पार्टीको सिद्धान्त र संगठनात्मक संरचनाका विषयमा केन्द्रित भएर छलफल गरिने संयोजन समितिका सदस्य एवम् एमाले महासचिव इश्वर पोख्रेलले जानकारी दिनुभयो ।
बैठकले पार्टी एकताका लागि सानो आकारको छुट्टै कार्यदल बनाउने बताइएको छ ।
सो कार्यदलले एकीकृत पार्टीको सिद्धान्त, संगठनात्मक संरचनाको ढाँचा तथा सरकार र पार्टीमा पदीय भागबण्डाको बारेमा छलफल गर्ने छ । कार्यदलले दिएको सुझावको आधारमा एकताको प्रक्रिया अघि बढ्ने बताइएको छ ।
