कार्तिक ९ टोकियो । जापानको टोकियो,ओकुबो स्थित नेवा डाईनिङ रेष्टुरेन्टमा यही कार्तिक ७ गते लिम्वुहरुको साझा संगठन किरात याक्थुङ चुम्लुङको एकता भेला सम्पन्न भएको छ । चुम्लुङ जापानका सल्लाहकार भगिश्वर इङ्नामको संयोजकत्वमा बसेको चुम्लुङ,जापानको दोस्रो चरणको दुई पक्षिय एकताको छलफलमा सामुहिक भेला मार्फत एकता गरिएको हो । भेलाले वर्तमान अध्यक्ष देवी बहादुर इङ्नामको नेतृत्वमा तेस्रो अधिबेशन सम्म निरन्तरता गरेर जाने र अधिबेशन संयोजक रिद्दि बहादुर तुम्बाहाम्फे रहने निर्णय गरेको छ ।
यसै गरी महासचिबमा मर्यादाक्रम अनुसार चन्द्र कुमार जबेगु,भेषराज चेम्जोङ रहने र अन्य पदाधिकारी तथा सदस्य लगायत सल्लाहकारहरू दुबै पक्षका यथावत राख्ने पनि निर्णय भएको चुम्लुङले जनाएको छ । चुम्लुङ जापानले,जापानमा रहेका सबै लिम्बूहरूलाई एकताबद्द गर्दै, लिम्बू भाषा,धर्म,संस्क्रृति,पहिचानको संरक्षण,संबर्द्दन गर्नमा एकजुट भएर लाग्नुपर्ने सल्लाहकार सुमन लिम्बूले सुझाब दिनु भएको थियो ।
महासचिब भेषराज चेम्जोङले उत्तेजना भन्दा पनि विचार र भावनाको नेतृत्व गर्दै सबै मिलेर समृद्ध समाज निर्माणमा लाग्नु पर्नेमा जोड दिनु भएको थियो । त्यस्तै पदम चेन्जिमाबोले,संस्था,एकताले नयाँ साहस थपिएको महसुस गर्दै,यसको श्रेय सम्पूर्णलाई हुने बिश्वास ब्यक्त गर्नु भएको थियो ।यसै गरी एकताको पहल र दबाबमा जुटेका देबेन्द्र लावती, सुदीप पालुङ्वा, लालधोज मादेम्बा लगायत अन्य मित्रहरूको भूमिका सराहनीय रहेकोले एकतामा ठूलो बल पुगेको भन्दै रिद्दि बहादुर तुम्बाहाम्फेले खुशी ब्यक्त गर्नु भएको थियो ।
