काठमाडौँ । अमेरिकाको उड्डयन क्षेत्र शुक्रबार दिउँसो करिब चार घण्टा पूर्ण रूपमा ठप्प भएको छ। सङ्घीय उड्डयन प्रशासन (FAA) ले देशभरका एयर ट्राफिक कन्ट्रोल सेन्टरहरूको सञ्चार प्रणालीमा गम्भीर समस्या (टेलिकम्युनिकेसन आउटेज) आएपछि सुरक्षाको कारण देखाउँदै सबै घरेलु तथा प्रस्थान उडानहरूमा रोक (ग्राउन्ड स्टप) लगाएको हो।
करिब ४ घण्टा २१ मिनेटको अवरोधपछि स्थानीय समयअनुसार राति ८:१५ बजे (EST) बाट पुनः उडान सेवा सुचारु गरिएको अमेरिकी यातायात मन्त्री शन डफीले जानकारी दिएका छन्।
कुन-कुन विमानस्थल प्रभावित भए ?
उडान प्रतिबन्धका कारण शिकागो ओ’हेयर, न्युयोर्कको जोन एफ केनेडी (JFK), वासिङ्टनको रोनाल्ड रीगन र सान फ्रान्सिस्को लगायत अमेरिकाका सबै प्रमुख विमानस्थलहरूबाट हुने उडानहरू रोकिएका थिए। फ्लाइट ट्र्याकिङ वेबसाइट ‘फ्लाइट अवेयर’ का अनुसार यस अवरोधका कारण १० हजारभन्दा बढी उडानहरू ढिलाइ भएका छन् भने ४ हजारभन्दा बढी उडानहरू रद्द भएका छन्। आकाशमा उडिरहेका करिब ३ हजार १ सय विमानहरूलाई भने सुरक्षित अवतरण गराइएको थियो।
सुरक्षा खतरा नरहेको स्पष्टोक्ति
एक्कासि देशभरका उडान रोकिँदा यात्रुहरूमा त्रास फैलिएको थियो। तर, डिपार्टमेन्ट अफ होमल्याण्ड सेक्युरिटी (DHS) का मन्त्री मार्कवेन मुलिनले पत्रकारहरूसँग कुरा गर्दै यो कुनै साइबर आक्रमण वा राष्ट्रिय सुरक्षामाथिको खतरा नभएको स्पष्ट पारेका छन्। “यो केवल एफएए (FAA) को सञ्चार प्रणालीमा आएको प्राविधिक गडबडी मात्र हो, सबै यात्रु र विमानहरू सुरक्षित छन्,” उनले भने। साथै, अघिल्लो दिन माइक्रोसफ्टमा आएको प्राविधिक समस्यासँग यसको कुनै सम्बन्ध नरहेको पनि उनले प्रस्ट पारे।
९/११ पछिको तेस्रो ठूलो उडान प्रतिबन्ध
अमेरिकी उड्डयन इतिहासमा यसरी देशव्यापी रूपमा सबै उडान रोकिएको यो तेस्रो पटक हो। यसअघि सन् २००१ को सेप्टेम्बर ११ (९/११) को आतङ्कवादी हमलापछि र सन् २०२३ को जनवरीमा एफएएको ‘नोटाम’ (NOTAM) कम्प्युटर प्रणाली बिग्रँदा देशभरका उडानहरू ग्राउन्डेड गरिएका थिए।
हवाई मार्ग खुलाइए पनि तालिका अस्तव्यस्त भएकाले नियमित उडानहरू सामान्य अवस्थामा फर्कन अझै केही समय लाग्ने एयरलाइन्सहरूले जनाएका छन्। (एजेन्सीको सहयोगमा)
