मास्को — रुसी राष्ट्रपति भ्लादिमिर पुटिनले युरोपेली मुलुकहरूलाई युद्धको चेतावनी दिँदै रुस जुनसुकै परिस्थितिमा पनि युरोपसँग युद्धका लागि तयार रहेको बताएका छन्। यद्यपि, रुस युद्धको पक्षमा नरहेको र यस्तो युद्धमा कसैको पनि जित नहुने उनको भनाइ छ।
नर्वेका राष्ट्रपति अलेक्ज्याण्डर स्टब र फिनल्यान्डका प्रधानमन्त्री जोनास गहर स्टोरसँगको भेटघाटका क्रममा राष्ट्रपति पुटिनले युरोपेली देशहरूसँग सम्बन्ध सुधारका जुनसुकै सकारात्मक कदमको रुसले स्वागत गर्ने बताए। यसअघि पनि युक्रेनलाई सहयोग गरेको भन्दै पुटिनले नेटो (NATO) लाई युद्धको धम्की दिँदै आएका थिए।
यसैबिच, पुटिनले बाल्टिक सागरमा जहाजरानी (शिपिङ) माथि प्रतिबन्ध नलगाउन युरोपेली देशहरूलाई चेतावनी दिएका छन्। अमेरिका-इरान तनाव र होर्मुज जलडमरूमध्य बन्द भएको प्रसङ्ग उल्लेख गर्दै पुटिनले युरोपेली देशहरू उत्तरी युरोपमा पनि उस्तै तनाव र जोखिम मोल लिन चाहन्छन् भनी प्रश्न गरे। यदि त्यसो गरिएमा रुसले पूर्ण शक्तिका साथ जवाफ दिने चेतावनी उनले दिए।
‘युरोपसँग युद्ध चाहँदैनौँ, तर परिस्थिति बिग्रिए कोही विजेता हुनेछैन’
फिनल्यान्ड र नर्वेका नेताहरूसँगको संवादमा पुटिनले तनाव सीमाभन्दा बाहिर गए दुवै पक्षले गम्भीर परिणाम भोग्नुपर्ने बताए। उनले भने, “हामी तयार छौँ, तर युरोपसँग कुनै युद्ध चाहँदैनौँ। यदि स्थिति धेरै अघि बढ्यो भने यो युद्धमा कोही पनि विजेता हुनेछैन, यो कुरा कसैले नभुलून्।”
साथै, उनले युरोपेली सरकारहरूसँग कूटनीतिक संवाद पुनः सुरु गर्ने प्रयासको समर्थन गर्दै रुस यसका लागि खुला रहेको र सम्भव सहयोग गर्न तयार रहेको स्पष्ट पारे।
