प्रहरी महानिरीक्षक (आईजीपी) दानबहादुर कार्कीमाथि राजीनामाको दबाब बढेको भन्दै प्रसारित समाचार तथा टिप्पणीप्रति प्रहरी प्रधान कार्यालयले गम्भीर ध्यानाकर्षण भएको जनाएको छ।
आईजीपी कार्कीको सचिवालयले बिहीबार विज्ञप्ति जारी गर्दै अपुष्ट र अनुमानका आधारमा समाचार तथा सामग्री सम्प्रेषण नगर्न सञ्चारमाध्यम र सामाजिक सञ्जाल प्रयोगकर्तालाई आग्रह गरेको छ। यस्ता भ्रामक सामग्रीले नागरिकमा नकारात्मकता बढाउने, सुरक्षा जोखिम निम्त्याउने र प्रहरी संगठनको विश्वास, छवि तथा निष्ठामा आँच पुर्याउने विज्ञप्तिमा उल्लेख छ। सीमित व्यक्तिहरूले सुरक्षा संगठनलाई विवादमा तानेर सरकारविरुद्ध खेल्ने नियतका साथ यस्ता गतिविधि गरिरहेको प्रहरीको ठहर छ।
गलत र भ्रामक सूचना फैलाउनेहरूमाथि प्रचलित कानुनबमोजिम अनुसन्धान गरी कारबाही अघि बढाइने चेतावनी दिँदै प्रहरीले समाचार सम्प्रेषणअघि तथ्य पुष्टि गर्न अनुरोध गरेको छ। नेपाल प्रहरी सरकारको निर्देशन र कानुनी दायरामा रही नागरिक सेवामा प्रतिबद्ध रहेको र कुनै पनि भ्रामक प्रचार वा दबाबबाट विचलित नभई आफ्नो संवैधानिक जिम्मेवारी पूरा गर्न कटिबद्ध रहेको स्पष्ट पारिएको छ।
