काठमाडौँ : प्रधानमन्त्री बालेन्द्र शाह र राष्ट्रिय स्वतन्त्र पार्टी (रास्वपा) का सभापति रवि लामिछानेबीच बुढानीलकण्ठस्थित लामिछाने निवासमा पाँच घण्टाभन्दा लामो गहन छलफल भएको छ।
स्रोतका अनुसार उक्त छलफलमा सरकारले ल्याउने तयारी गरेको अध्यादेश, रास्वपा सांसद खगेन्द्र सुनारसँग जोडिएको विवादित अडियो प्रकरण तथा नेपाल प्रहरीका महानिरीक्षक (आईजीपी) दानबहादुर कार्कीसँग सम्बन्धित समसामयिक विषयहरूले मुख्य प्राथमिकता पाएका छन्।
विशेषगरी सरकारले ल्याउन लागेको अध्यादेशबारे बैठकमा गम्भीर परामर्श भएको छ। त्यसैगरी सांसद सुनार जोडिएको विवादका सम्बन्धमा चाल्न सकिने सम्भावित कानुनी एवं अन्य कदमबारे समेत दुई नेताबीच विचार-विमर्श भएको छ।
यस्तै, आईजीपी कार्कीसँग सम्बन्धित विषयमा दुवै नेताले आ-आफ्ना धारणा आदानप्रदान गरेका छन्। उक्त विषयमा सभापति लामिछानेले आफ्नो अडान प्रस्तुत गरेको र प्रधानमन्त्री शाह कार्कीको भूमिकाप्रति असन्तुष्ट रहेको स्रोतको दाबी छ। यद्यपि, यस सम्बन्धमा दुवै पक्षबाट आधिकारिक धारणा भने सार्वजनिक गरिएको छैन।
यसका अतिरिक्त प्रधानमन्त्री शाहको आगामी भारत भ्रमणका साथै सरकारका नीतिगत र प्रशासनिक निर्णयहरूका विषयमा पनि समीक्षा एवं जानकारी आदानप्रदान भएको छ। लामो समयसम्म चलेको उक्त बैठकका निर्णय र विषयवस्तुबारे दुवै पक्षले हालसम्म कुनै औपचारिक जानकारी दिएका छैनन्।
