न्युयोर्क, ८ जेठ । अमेरिकाको टेक्सासमा हालै विषाक्त सुई लगाएर एक अपराधीलाई मृत्युदण्ड दिइएको छ ।
१३ वर्षअघि मे २० मा उनले डलासमा पसल लुट्ने क्रममा एक महिलालाई आगो लगाएर निर्मम हत्या गरेका थिए। सोही आरोपमा उनलाई बुधवार सुई लगाएर मृत्युदण्ड दिइएको हो ।
४९ वर्षीय म्याथ्यु ली जोनसनलाई हन्ट्सभिलको राज्य कारागारमा घातक सुई लगाइयो र स्थानिय समय अनुसार साँझ ६ः५३ मा मृत घोषणा गरिएको अधिकारीहरूले बताएका छन्।
जोनसनलाई २० मे २०१२ मा गारल्याण्डको डलास उपनगरमा ७६ वर्षीया न्यान्सी ह्यारिसलाई ज्वलनशील तरल पदार्थले जिउँदै आगो लगाएको अभियोगमा दोषी ठहर गरिएको थियो। सो आक्रमणको केही दिन पछि नै ह्यारिसको उपचारका क्रममा मृत्यु भएको थियो। ह्यारिसले त्यो पसलमा १० वर्षभन्दा बढी समय काम गरेका थिए। उनका चार छोरा, ११ नातिनातिना र सात जना नातिनातिना रहेका छन्।
जेल वार्डनले उनको अन्तिम बयानको लागि सोध्दा जोनसनले पीडितको परिवारलाई हेरेका थिए र मनिलो अनुहार लगाउँदै माफी माग्दै भने, ‘मैले उनीहरूलाई हानि पुर्याउने उद्देश्य कहिल्यै राखेको थिइन, दुर्भाग्यबस यस्तो अप्रिय घटना घटयो, त्यसका लागि म उहाँका परिवारजनसँग माफी माग्दछु ।’ अदालतमा जोनसनले अपराध स्वीकार गर्दै मादक पदार्थ सेवन गरेका कारण आफुले सो दिन के गरेको हो ? बुझ्नसमेत नसकेको बताएका थिए ।
अभियोजकहरूले भने कि ह्यारिस स्टोरमा काम गरिरहेकी थिइन, जब जोनसन भित्र पसे, उनको टाउकोमा ज्वलनशील तरल खन्याए र पैसा मागेका थिए तर उनले पैसा दिन आनाकानी गरे पछि उनले आगो लगाउने उदेश्य राखेका थिए ।
अदालतका कागजातहरूका अनुसार जोनसनले पैसा खोसे पछि ह्यारिसलाई आगो लगाएका थिए र शान्तिपूर्वक स्टोरबाट बाहिर निस्केका थिए। ह्यारिसले आगो निभाउने प्रयासका लागि पसलबाट बाहिर निस्के र मद्दतको लागि चिच्याएका थिए । एक प्रहरी अधिकारीले आफ्नो शरीरमा लागेको आगो निभाउन उपकरण प्रयोग गरे र आगो निभेको पनि थियो । तर, उनी धेरै दिन बाँचेनन् ।
सो घटना घटाएको करिब एक घण्टा पछि नै जोनसन पक्राउ परेका थिए । एक नर्स र डाक्टरले बयान दिए अनुसार ह्यारिसको टाउको, अनुहार, घाँटी, काँध, माथिल्लो हात र खुट्टाहरू नराम्ररी जलेका थिए र उनी मर्नु अघि धेरै पीडामा पनि थिए ।
