भारत नियन्त्रित जम्मू–कश्मिरको पहलगममा आतंकवादी हमला हुँदा कम्तीमा २६ जनाको मृत्यु भएको छ। मंगलबार दिउँसो पहलगमको बाइसरन उपत्यकामा बन्दुकधारी आतंकवादी समूहले आक्रमण गर्दा कम्तीमा २६ जनाको मृत्यु भएको हो।
सेना प्रहरीको पोशाक लगाएर बसेका बन्दुकधारीहरुले धर्म सोध्दै गोली हानेको प्रत्यक्षदर्शीहरुले बताएको भारतीय सञ्चार माध्यमहरुले जनाएका छन् ।
मृतकमध्ये अहिलेसम्म दुई जना विदेशी नागरिक, एक नौसेना जवान र दुई जना स्थानीयको पहिचान खुलेको सञ्चार माध्यमहरूले जनाएका छन्।
गोली चलेको आवाज सुनेपछि सुरक्षाकर्मीहरू पहलगम पुगेका थिए। मिनी स्विट्जरल्यान्ड भनेर चिनिने पर्यटकीय क्षेत्र पहलगम श्रीनगरबाट करिब ९० किलोमिटर टाढा पर्छ। घटनामा एक दर्जन बढी मानिसहरु घाईते भएका छन् ।
हाल साउदी अरबको भ्रमणमा रहेका भारतीय प्रधानमन्त्री नरेन्द्र मोदीले घटनाबारे गृहमन्त्री अमित शाहसँग कुराकानी गर्दै मृतकका परिवारप्रति समवेदना व्यक्त गरेका छन्। घटनाको निन्दा गर्दै उनले यसमा संलग्न व्यक्तिहरूलाई कारबाही गरिने बताएका छन्। मोदी भ्रमण छोट्याएर दिल्ली आएका छन् ।
