प्यालेष्टाईनको गाजामा ईजरायलले नरसंहार शुरु गरेको एक बर्ष पूरा भएको छ । अक्टोबर ७ मा ईजरायलभित्र प्रवेश गरेर हमास लडाकु समुहले गरेको आक्रमणको बदला लिन भन्दै शुरु गरिएको ईजरायली आक्रमण अझै रोकिएको छैन ।
एक वर्षमा गाजाका स्कुल, अस्पताल, शरणार्थी शिविर सबै पूर्वाधारहरु ध्वस्त मात्र पारिएको छैन । ईजरायली आक्रमणमा विदेशी नागरिकहरु सहित १७ हजार बालबालिका, ११४८७ महिला समेत गरी ४१८७० जना मानिसको मृत्यु भएको छ ।
ईजरायलले अस्पतालहरुमा आक्रमण गर्दा १७१ जना बच्चाको जन्मनासाथ हत्या भयो भने एक वर्ष मुनिका ७१० बच्चाहरु मारिए ।
यसै गरी करीब १ हजार स्वास्थ्यकर्मी मारिदा २६ हजार बालबालिका टुहुरा भएका छन् ।
ईजरायली आक्रमणमा दशौँ हजार प्यालेष्टाईनीहरु घाईते अवस्थामा छन् । यो अवधिमा ईजरायलले गाजाको १८७ बस्तीको एक लाख ६३ हजार नागरिकका घरहरु समेत ध्वस्त पारेको छ ।
गाजाबाट हमासलाई समाप्त पार्ने भन्दै प्रवेश गरेको ईजरायली सेनाले अझै पनि ६४ जना बन्धक छुटाउन सकेको छैन ।
यही बेला ईजरायलले लेवनानमा अर्को नरसंहार शुरु गरेको छ । हेजबुल्लाहलार्ई समाप्त पार्ने भन्दै राजधानी बेरुतमा जथाभावी हवाई आक्रमण गर्दा संयौ मानिसको ज्यान गएको छ ।
१२ लाख बढी नागरिक विस्थापित भएका छन् । अमेरीकी हतियार र शक्तिको आडमा ईजरायलले यी नरसंहारकारी आक्रमणहरु जारी राखेको छ ।
