काठमाडौँ । प्रधानमन्त्री पुष्पकमल दाहाल ‘प्रचण्ड’ सिंहदरबारको पश्चिमतर्फ रहेको रेट्रोफिटिङ गरी बनाइएको कार्यालयमा सरेका छन् । प्रधानमन्त्री दाहाल आज सो भवनमा सरेका हुन् ।
२०७२ सालको विनाशकारी भूकम्पले सो भवनमा क्षति पुगेपछि त्यसलाई पुनर्निर्माण गरी तयार गरिएको हो । नयाँ कार्यालयमा सरेको अवसरमा सञ्चारकर्मीहरूलाई प्रतिक्रिया दिँदै उनले नयाँ सुरुवातले नयाँ गति पक्रने आशा व्यक्त गरे । उनले पहिले कार्यालय रहेको ठाउँभन्दा यो ठाउँ अलि खुला र फराकिलो रहेकाले नयाँ कुराहरू फुर्न सक्ने पनि बताए ।
प्रधानमन्त्रीले पछिल्लो भागबाट अघिल्लो भागमा पहिलाको ठाँउ अलि गुम्म परेको र अहिले बरण्डाबाट सबैतिर देखिने, ठाँउ पनि ठूलो रहेकाले आफ्नो दिमाग फुर्ने महसुस गरेको बताए ।
१२० वर्ष पूरानो यो भवनको रेट्रोफिटिङ गरेर भत्किएका चर्किएका ठाँउहरु पूरानै शैलीमा मर्मत गरी पूरानो संरचना ज्यूका त्यूँ राखिएको छ ।
