काठमाडौं । प्रधानमन्त्री पुष्पकमल दाहाल प्रचण्डले अहिले बिहान ८ बजेका लागि मन्त्रिपरिषद् बैठक बोलाएका छन् । शुक्रवार जाजरकोट र रुकुमुमा गएको भूकम्पबाट भएको क्षति तथा भूकम्प प्रभावितको राहत तथा उद्धारबारे छलफल र निर्णयका लागि बैठक बोलाईएको हो ।
शनिवार भूकम्प प्रभावित क्षेत्रमा सबै मन्त्रीहरू राहत तथा उद्धारमा केन्द्रित भएका कारण उद्धार, राहत र पुर्नस्थापनाका लागि आज आकस्मिक बैठक बोलाइएको प्रधानमन्त्रीको सचिवालयले जनाएको छ ।
सरकारले जाजरकोट र पश्चिम रुकुमका भूकम्प प्रभावित क्षेत्रमा खोजी तथा उद्धारको काम सकिएको बताएको छ ।
भूकम्प गएदेखि नै नेपाली सेना, सशस्त्र प्रहरी, नेपाल प्रहरी लगायतले शुरु गरेको उद्धार र खोजी कार्य हिजो अपरान्ह पुरा भएको सरकारले बताएको हो । प्रधानमन्त्री बिहानै जाजरकोट रुकुम पुगेर घाईतेको उद्धारमा संलग्न भएका थिए । उनी हिजो दिनभरी नै प्रभावित जिल्लामा रहेर अपरान्ह काठमाण्डौँ फर्किएका थिए ।
प्रधानमन्त्री प्रचण्डले आजदेखि राहत र पुनर्स्थापनाको काम शुरु गर्ने बताए ।
