एमाले अध्यक्ष केपी शर्मा ओलीले आफूले कम्बोडियाको टेलिकममा लगानी गरेको प्रमाणित गर्न सार्वजनिक चुनौती दिएका छन्। उनले प्रमाणित गर्नेलाई पुरस्कारको पनि घोषणा गरेका छन्।
‘कम्बोडियामा ३ हजार करोड मैले राखेको छु भने धेरै नाफा हुने बिजनेस दिन्छु। देशको यत्रो पैसा लुकाएको रहेछु भने पत्ता लगाउनुस्,’ उनले भने,‘ धेरै त छैन एक हजार रुपैयाँ थपेर सबै दिन्छु। एक हजार रुपैयाँ बक्सिस भयो, अरु ३ हजार करोड सबै भयो।’
कुनै समय ओली निकट मानिने एमाले पूर्वकेन्द्रीय सदस्य दुर्गा प्रसाईंले केही दिनअघि केपी ओलीमाथि कम्बोडियाको टेलिकममा ३ हजार करोड लगानी गरेको आरोप लगाएका थिए।
एमाले गण्डकीको नवनिर्वाचित कमिटीको सपथ ग्रहण समारोहलाई सोमबार सम्बोधन गर्ने क्रममा उनले प्रसाईंको भनाइको प्रतिवाद गरेका हुन्।
भारतले हडपेको नेपाली भूभाग समेटेर नक्सा जारी गरेसँगै ३ वर्षअघि भारतीय मिडियाले गलत समाचार सम्प्रेषण गरेको र अहिले आएर त्यही अनर्गल समाचारसँग जोडेर आफ्नो र एमालेको चरित्रहत्याको प्रयत्न गरिएको उनको भनाइ थियो।
उनले भुस्याहा कुकुर र मान्छेको प्रसंग झिक्दै पेट सबैको हुने तर के खाने के नखाने भन्ने कुरामा प्रष्ट हुनपर्ने भन्दै राज्यको ढुकुटीबाट गलत ढंगले एक पैसा पनि नखाएको पनि बताए।
