मंसिर ४, धनगढी । बाजुराको प्रदेश निर्वाचन क्षेत्र (१) अन्तर्गत पर्ने स्वामीकार्तिक गाउँपालिका १ मतदानस्थलको (क) केन्द्रस्थित प्रदेश समानुपातिक मतपेटिकामा आगजनी भएको छ ।
मतदान भईरहेको समयमा अचानक मतपेटिकाबाट धुवा निस्कििएको मतदान अधिकृत रामकुमार यादवले बताए । उनका अनुसार मतपेटिकामा आगजनी कसरी र कसले गरेको भन्नेबारे यकिन कारण थाहा हुन सकेको छैन । आफूहरूले मतदातालाई मतपत्र दिएर मतदानका लागि पठाउँदै गरेको, उता मतपेटिकामा एकाएक धुवाँ निस्किएको यादवले बताए ।
आगो देखिएपछि पेटिकामा पानी खन्याइएको उनको भनाइ छ । कुल ८४० मतदाता रहेकामा त्यस केन्द्रमा ५२८ मत खसेको थियो । तर आगलागीबाट कति मतपत्रमा क्षत्रि पुग्यो भन्ने पनि यकिन भएको छैन ।
उक्त घटनापछि के गर्ने भन्ने विषयमा छलफल भइरहेको मतदान अधिकृत यादवले बताए । सुरक्षाकर्मीले कसैलाई पनि नियन्त्रणमा भने लिएको छैन । तर मतदान अहिले रोकिएको छ ।
यसैबीच, प्रतिनिधिसभा र प्रदेशसभा निर्वाचनमा आज जारी मतदानमा १५ वटा मतदान केन्द्रमा मतदान स्थगित भएको छ ।
निर्वाचन आयोगले मतदान रोकिएका स्थानमा मतदान सुरु गर्ने प्रयास भइरहेको बताएको छ ।
“प्रतिनिधिसभा तथा प्रदेशसभा सदस्य निर्वाचनमा देशभर शान्तिपूर्ण रूपमा मतदान भइरहेको छ”, आयोगले भनेको छ, “अपरान्ह ३ः३० बजेसम्म १५ मतदान केन्द्रमा मतदान कार्य रोकिएको छ । यी रोकिएका मतदान केन्द्रमा मतदान कार्य सुचारु गर्न प्रयास भइरहेको छ ।”
