हेटौंडा, २३ असोज । राप्रपा नेपालका अध्यक्ष कमल थापालाई समर्थन गरको विरोधमा नेकपा एमाले मकवानपुरका असन्तुष्ट कार्यकर्ताहरुले मकवानपुर पार्टी कार्यालयमा तालाबन्दी गरेका छन्।
प्रतिनिधिसभा मकवानपुर १ मा एमालेले थापालाई समर्थन गरको विरोधमा उनीहरुले आज बिहान तालाबन्दी गरेका हुन्।
एमालेले यस अघि उक्त क्षेत्रमा एमाले मकवानपुरका इन्चार्ज रामेश्वर रानालाई उम्मेदवार बनाउने निर्णय गरेको थियो। तर पार्टी अध्यक्ष केपी ओलीले शनिबार उक्त निर्णय परिवर्तन गरेर राप्रपा नेपालका अध्यक्ष थापालाई सूर्य चिन्हमा चुनाव लड्ने गरी टिकट दिएका हुन्।
कार्यकर्ताहरुले थापालाई उम्मेदवार बनाउने पार्टी केन्द्रको निर्णयविरुद्ध जिल्ला नेतृत्व मौन रहेको भन्दै विरोध गरेका हुन्। मकवानपुर १ मा तीन पटक थापालाई हराएका एमाले नेता कृष्ण दाहालले अनुकुल परिस्थिलाई प्रतिकुल बनाउने निर्णय गलत भएको बताए।
