काठमाडौं । नेपाली कांग्रेसका निवर्तमान सभापति शेरबहादुर देउवाले पार्टीको आधिकारिकतासम्बन्धी मुद्दामा सर्वोच्च अदालतबाट निष्पक्ष न्याय पाइने विश्वास व्यक्त गरेका छन्।
शनिबार ललितपुर जिल्ला अधिवेशनलाई सम्बोधन गर्दै देउवाले अदालतले सही निर्णय गर्नेमा आफू पूर्ण रूपमा ढुक्क रहेको बताए। ‘मलाई विश्वास छ, न्याय हुन्छ, हुन्छ, हुन्छ। यो पार्टी हाम्रो हो, हाम्रै रहन्छ, कतै जाँदैन,’ देउवाले भने, ‘राजाको पालामा समेत निष्पक्ष फैसला गर्ने अदालतले अहिले किन गर्न सक्दैन?’
सम्बोधनका क्रममा देउवाले गगन थापाको नेतृत्वमा भएको विशेष महाधिवेशनप्रति असन्तुष्टि जनाउँदै आफूसँग कुनै सल्लाह नलिइएको दाबी गरे। ‘पार्टी सभापति मै छु, मलाई थाहै छैन। विशेष महाधिवेशन गरेर गगन थापा सभापति भइसक्नुभएको रहेछ,’ उनले भने।
साथै, निवर्तमान सभापति देउवाले जेनजी विद्रोहका क्रममा आफूमाथि ज्यानै लिने नियतले आक्रमण भएको र गम्भीर घाइते भएको उल्लेख गरे। सुरक्षाकर्मीको तत्परताका कारण मात्रै आफ्नो ज्यान जोगिएको भन्दै उनले जेनजीको नाममा आफूहरूमाथि षड्यन्त्र गरिएको आरोप समेत लगाए।
