काठमाडौं, १९ असोज । राष्ट्रपति विद्यादेवी भण्डारीले विजया दशमीको दिन विशिष्ट व्यक्तिका साथै आम सर्वसाधारणलाई टीका लगाइदिएकी छिन् ।
राष्ट्रपति भण्डारीले आज दिउँसो २ बजेदेखि ३ बजेसम्म विशिष्ट र ३ बजेपछि सर्वसाधारणलाई टीका तथा जमरा लगाइदिएकी हुन् । टीका लगाउनको लागि मानिसहरू राष्ट्रपतिको सरकारी निवास शीतल निवास पुगेका थिए ।
त्यसअघि राष्ट्रपति भण्डारीले शितल निवासमा साइतअनुसार ११ः५१ बजे गुरुहरु देवराज अर्याल र खेमचन्द्र ढकालको हातबाट बडादसैंको टीका ग्रहण गरेकी थिइन् ।
आफूले टीका ग्रहण गरेपछि भण्डारीले गुरुहरू, छोरी, छोरीज्वाइँ, नातिनी, आफन्त र सुरक्षाकर्मीहरूलाई टीका र प्रसाद प्रदान गरेकी थिइन् ।
बुधवार बिहान मात्रै पनि राष्ट्रपति विद्यादेवी भण्डारीले दसैँको सन्देश जारी गर्दै विश्वभर छरिएर रहेका सम्पूर्ण नेपाली नागरिकहरूमा सुख, शान्ति, समृद्धि एवं उत्तरोत्तर प्रगतिको कामना गरेकी थिइन् । बडादसैँ पर्वले सम्पूर्ण नेपालीबीचको सामाजिक–सांस्कृतिक ऐक्यबद्धतालाई थप सुदृढ गर्दै न्यायपूर्ण, समतामूलक, सभ्य एवं सुसंस्कृत समाज निर्माणका लागि थप उत्साह, उमङ्गका साथ क्रियाशील रहन प्रेरणा प्रदान गरोस् भनी शुभकामना व्यक्त गरेकी थिइन् ।
