असोज ३ काठमाण्डौँ । नेकपा माओवादी केन्द्रका अध्यक्ष प्रचण्डले आफूले क्रान्ति र शान्तिको नेतृत्व गरिसकेको भन्दै अब समृद्धिको नेतृत्व गर्ने ईच्छा रहेको बताएका छन् ।
सोलुखुम्बुको थुलुङ दूधकोशी गाउँपालिकामा निर्मित भौतिक संरचनाको उद्घाटन गर्दै प्रचण्डले अब मुलुकमा आर्थिक क्रान्ति र समृद्धिको काम अघि बढ्ने बताए ।
जनयुद्धले सामन्तवादको अन्त्य गरेको भन्दै प्रचण्डले अब समाजवाद मार्फत आर्थिक समृद्धि हासिल हुने भएकाले सबैले त्यो दिशामा लाग्नु पर्ने बताए ।
प्रचण्डले स्थानीय तहलाई अझै अधिकार सम्पन्न बनाउन केही ऐन कानुनहरु बन्न बाँकी रहेको पनि बताए ।
कार्यक्रममा एकै साथ ५० शय्याको दूधकोशी सामुदायिक अस्पताल, बहुप्राविधिक शिक्षालय र गाउँपालिकाको भवनको पार्टी अध्यक्ष प्रचण्डले उद्घाटन गरेका छन् । दूधकोशी सामुदायिक अस्पताल १५ करोड, बहुप्राविधिक शिक्षालय ५ करोड र गाउँपालिकाको प्रशासनिक भवन पौने ७ करोडको लागतमा निर्माण सम्पन्न भएको गाउँपालिका अध्यक्ष असिम राईले बताए ।
