भदौ ३० काठमाण्डौँ । नेकपा एमालेका अध्यक्ष केपी शर्मा ओलीले आफूले प्रचण्डलाई अंगालो हाले पनि उनले आफूलाई छुरी घोपेर भष्म पार्न खोजेको टिप्पणी गरेका छन् ।
आज पार्टी कार्यलयमा आयोजित पार्टी प्रवेश कार्यक्रममा बोल्दै ओलीले पार्टी एकता गरौँ, वामपन्थी आन्दोलन बलियो बनाआँै, समाजवादतिर अघि बढौँ भनेर नजिकै राखेर अध्यक्ष बनाएको तर प्रचण्डले लुकिछिपि आफू बिरुद्ध षड्यन्त्र गरेर छुरी धसेको बताए ।
प्रचण्ड जहिले पनि धोका दिने खालको भएको भन्दै उनले त्यसबाट कहिले सफल नहुने बताए ।
उनले आगामी निर्वाचनमा एमाले एक्लैले ५० लाख मत ल्याउने भन्दै त्यसै अनुसार लागि पर्न कार्यकर्ताहरुलाई निर्देशन पनि दिए ।
आफैले अध्यक्ष बनाईदिएको प्रचण्डले आफूलाई पार्टी सदस्य समेत नरहने गरी कार्बाही गरेको भन्दै माओवादी एमालेसँग मिलेको र अहिले प्रचण्ड गुट मात्र बाँकी रहेको दावी पनि ओलीको छ ।
