भदौ १४ काठमाण्डौँ । भदौ पहिलो साता सिट बाँडफाँट गरिसक्ने भनेको पाँच दलीय गठबन्धनले अहिले सम्म यस विषयमा सहमति जुटाउन सकेको छैन ।
पाँच दलले बनाएको कार्यदलले सिट बाँडफाँटमा सहमति गर्न नसक्दा यो विषय पेचिलो बन्दै गएको छ ।
कार्यदललाई पटक पटक दिईएको समय सीमामा पनि सहमति नभएपछि यो जिम्मेवारी शीर्ष नेताहरुमै पुगेको छ ।
गठबन्धन भित्र सिट बाँडफाँटको समस्या काँग्रेसका कारण भईरहेको माओवादीको दावी छ । माओवादी महासचिव देव गुरुङले काँग्रेस लचक नहुँदा समस्या आईरहेको भन्दै दलहरुबीच सहमतिको संभावना भने रहेको बताए ।
माओवादी बटम लाईनको बारे सोध्दा उनले माओवादीले दावी गरेको सिट नछाड्ने नै अडान रहेको तर केही कम्प्रोमाईज हुन सक्ने बताए ।
ढिलोमा भदौ २० भित्र सिट र क्षेत्र बाँडफाँट सक्ने संभावना रहेको उनले बताए । गठबन्धन भित्र काँग्रेसले एक सय सिट र माओवादीले ६० सिटमा दावी गरेका छन् ।
