एजेन्सी साउन २३ । चीनीया जनमुक्ति सेनाले पहिलो चरणको घोषित सैन्य अभ्यासलाई ताईवानलाई पुनः एकीकरण नगरेसम्म जारी राख्ने घोषणा गरेको छ । यसले दक्षिणी चीनीया सागरमा थप तनाव बढ्ने अनुमान गरिएको छ । गत मंगलबार अमेरीकी संसदकी सभामुख न्यान्सी पेलोसीले चीनको चेतावनीका बीच ताईवान भ्रमण गरेपछि आक्रामक बनेको जनमुक्ति सेनाले ताईवानलाई ६ तिरबाट घेरेर भीषण सैन्य अभ्यास शुरु गरेको थियो ।
४ अगष्ट देखि ७ अगष्ट सम्म घोषित अभ्यास हिजै सकिए पनि थप अभ्यास जारी राखिएको छ । चीनको रकेट फोर्स, स्ट्राटेजिक फोर्स, एयरफोर्स, जलसेना र थल सेनाले ताईवानी सीमानामा अभ्यास गरिरहेको छ ।
आजको अभ्यासमा एन्टी सबमरिन ध्वस्त पार्ने, रणनीतिक क्षेप्यास्त्र सटिक प्रहार गर्ने र स्थल, हवाई र जल क्षेत्रबाट सँयुक्त कार्बाहीको वास्तविक अभ्यास भईरहेको जनमुक्ति सेनाको ईस्टर्न थिएटर कमाण्डले जारी गरेको विज्ञप्तिमा उल्लेख छ ।
जनमुक्ति सेनाको यो अभ्यासका क्रममा ताईवानमा नाकाबन्दी जस्तो बनेको छ । ताईवान भित्र जान र बाहिर जान जल मार्ग बन्द जस्तै अवस्थामा छ भने हवाई रुट पनि प्रभावित छ ।
पेलोसीको भ्रमणपछि चीनले ताईवान एकीकरण अभियान तीव्र पार्ने भएको छ ।
