माघ १४, काठमाडौं
चीनमा फैलिएको नोवल कोरोना भाइरसको प्रकोप १७ राष्ट्रमा फैलिएको छ ।
पछिल्लो पटक क्यानडामा पनि यो भाइरसबाट संक्रमित भेटिएको बीबीसीले जनाएको छ । हालसम्म कोरोनाको संक्रमणबाट मृत्यु भएकाको संख्या १ सय ६ पुगिसकेको छ ।
४ हजार भन्दा बढीमा यो भाइरसको संक्रमण पुष्टी भएको छ । चीन बाहेक अन्य मुलुकमा पनि यो भाइरसको संक्रमण भेटिएपनि मृत्यु भएकाहरु सबै चिनियाँ नागरिक मात्रै भएको बीबीसीले उल्लेख गरेको छ ।
विश्व स्वास्थ्य संगठन तथा राष्ट्रिय निकायका अनुसार चीन बाहिर कम्तीमा ४७ जनामा संक्रमण पुष्टि भएका छन् । नेपालसहित थाइल्यान्ड, अमेरिका, अस्ट्रेलिया र सिङ्गापुर, ताइवान, मलेसिया र दक्षिण कोरिया, फ्रान्स र जापा, भियतनाम, , क्यानडा, क्याम्बोडिया, श्रीलंका र जर्मनीमा पनि कोरोनाको संक्रमण भेटिएको छ ।
पहिलो पटक संक्रमण देखिएको वुहान शहरमा मात्रै मृत्यु हुनेको सख्या ७६ पुगेको छ । राजधानी बेइजिङमा पनि पहिलो पटक संक्रमणका कारण एक जना ५० वर्षिय व्यक्तिको मृत्यु भएको छ ।
मृत्यु हुने अधिकांश बढी उमेरका र पहिले देखिकै श्वासप्रश्वासका समस्या भएकाहरु रहेका छन् । वुहान शहरमा आवतजावतमा प्रतिबन्ध लगाइएको छ भने अरु शहरमा पनि यात्रामाथि थप कडाइ गरिएको छ ।
संक्रमण बढ्दै गएपछि लुनार नयाँ वर्षको विदा पनि तीन दिन लम्ब्याइएको छ । सांघाईमा माघ १० गतेसम्मका लागि सम्पूर्ण व्यवसाय बन्द गरिएको छ ।
यो भाइरसको हालसम्म कुनै विशेष उपचार र खोप पत्ता लागेको छैन ।
