एजेन्सी, जेठ २१ ।
उत्तर कोरियाली नेता किम जोङ उनले मृत्युदण्ड दिएको भनिएका वरिष्ठ अधिकारी जीवितै रहेको खुलेको छ । अन्तराष्ट्रिय सञ्चारसंस्था सिएनएनले नेता किमले आफ्ना वरिष्ठ अधिकारीलाई मृत्युदण्ड दिएको भन्ने समाचार दक्षिण कोरियाली समाचारपत्रले प्रकाशित गरेको थियो ।
तर उक्त समाचरपत्रको दाबीको चर्चा चल्दै गर्दा मृत्युदण्ड दिइएका भनिएका अधिकारीहरु भने जीवित रहेको दाबी सीएनएनले गरेको हो । अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङ उनबीच भियतनामको हनोइमा भएको वार्ता असफल भएपछि अमेरिकाका लागि विशेष प्रतिनिधि रहेका किम ह्योक चोललाई मृत्युदण्ड दिएको दक्षिण कोरियाली पत्रको दाबी थियो।
तर सीएनएनले भने चोललाई मृत्युदण्ड नदिइएको तर वार्ता असफल भएका कारण उनको बारेमा अनुसन्धान भइरहेको उल्लेख गरेको छ । चोलसहित विदेश मन्त्रालयका चार अधिकृतहरुलाई मार्चमा मिरिम विमानस्थलमा मृत्युदण्ड दिइएको बताइएको थियो । उनीहरुलाई अमेरिकाका लागि जासुसी गरेको आरोपसमेत लगाइएको बताइएको थियो।
ट्रम्प किम वार्ताका समय मिडियामा चर्चामा रहेकी किमकी बहिनी किम यो जोङ पनि हनोइ वार्तापछि सार्वजनिक रुपमा देखा नपरेको बताइएको थियो। तर उत्तर कोरियाली दक्षिण कोरियाको कुनै पनि दाबीको पुष्टि गरेको छैन। अमेरिकाले सो रिपोर्टका बारेमा अनुसन्धान गरिरहेको बताउँदै गर्दा सीएनएनले मृत्युदण्ड दिएका अधिकारीहरु जीवितै रहेको दाबी गरेको हो।
