काठमाडौं, १५ जेठ ।युरापेली संसद्को मुख्य भूमिकाको बिषयमा फ्रान्स र जर्मनीबीच विवाद देखिएको छ । युरोपेली संसद्का लागि भएको निर्वाचनपछि मुख्य भूमिका कसलाई दिने भन्ने विषयमा विवाद देखिएको छ ।
युरोपेली संसद्मा ठूला मानिएका मध्य दक्षिणपन्थी र मध्य वामपन्थी समूहले आफ्नो बहुमत गुमाएपछि कसलाई मुख्य भूमिका दिने भन्नेमा विवाद देखिएको छ ।
निर्वाचनपछि उदारवादी, राष्ट्रवादी र हरित पार्टीहरूप्रतिको जनसमर्थन बढेको छ ।
ब्रसेल्समा भएको युरोपेली नेताहरूको बैठकमा फ्रान्स र जर्मनीका नेताहरूको छुट्टाछुट्टै प्रतिक्रिया आएपछि नेतृत्व चयनमा समस्या देखिएको हो ।
जर्मन चान्सलर एङ्गेला मर्केलले मध्य दक्षिणपन्थी उम्मेदवार मानफ्रेड वेबरलाई युरोपेली आयोगको नयाँ अध्यक्ष बनाउन चाहेकी छन् ।
तर फ्रान्सका राष्ट्रपति इमानुएल माक्रोंले भने वेबरलाई सम्भावित तीन उम्मेदवारमा समेत उनको नाम उल्लेख गरेका छैनन् ।
मर्केलले वेबरको समर्थन गर्नुअघि माक्रोंले आफूले पक्ष लिएका उम्मेदवारको नाम नलिए पनि सिर्जनशील र योग्य मानिस चाहिएको बताएकी थिइन ।
पछिल्लो चुनावले युरोपेली संघलाई थप विभाजित देखाएको छ ।
अधिकांश निर्णय सहमतिबाटै हुने गरेको संघमा अब सहमतिबाट काम गर्न कठिन हुने परिस्थिति सुरुदेखि नै देखिएको छ ।
सन् २०१४ मा निर्वाचन जितेको मध्य दक्षिणपन्थी युरोपियन पिपुल्स पार्टी (इपीपी)का जँ क्लोड यंकर अध्यक्ष बनेका थिए ।
तर यसपटक इपीपीकै उम्मेदवार जर्मनीका मानफ्रेड वेबरका लागि त्यो बाटो कठिन देखिएको छ । यसपटक यो पार्टीले ७५१ सदस्यीय संसद्मा १८० स्थानमा जितेको छ ।
यसअघि यो पार्टीले २१७ स्थानमा जित हात पारेको थियो । प्रत्येक पाँच वर्षमा ७५१ सदस्यीय युरोपेली संसद्का लागि २८ सदस्य देशमा प्रत्यक्ष निर्वाचन हुने गर्दछ ।
