एजेन्सी, जेठ ८।
इन्डोनेसियामा जोको विडोडो पुनः राष्ट्रपति पदमा निर्वा्चित भएको घोषणा भएसँगै राजधानी जकार्ता लगायत अन्य शहरमा प्रदर्शन भएको छ । प्रहरीसँग भएको झडपमा ६ जना प्रदर्शनकारीको मृत्यु भएको सरकारी अधिकारीहरुलाई उद्धत गर्दै अन्तराष्ट्रिय सञ्चारमाध्यमले जनाएका छन् ।
प्रदर्शनका क्रममा २०० जनाभन्दा बढी प्रदर्शनकारी घाइते भएका छन् । विश्वको तेस्रो ठूलो प्रजातान्त्रिक देश मानिएको इन्डोनेसियामा कडा सुरक्षाबीच हिजो निर्वाचन परिणाम घोषणा गरिएको थियो । त्यस लगत्तै विपक्षीहरुले आन्दोलन सुरु गरेका थिए । प्रहरीले हिंसा फैलाएको आरोपमा २० जनालाई पक्राउ गरि अनुसन्धान गरिरहेको छ।
निर्वाचन आयोगले विडोडोलाई राष्ट्रपति घोषणा गरेपनि प्राबोवोले निर्वाचन आयोगको औपचारिक कागजातमा हस्ताक्षर गर्न नमानेको बताइएको छ । सुविआन्तोले निर्वाचनमा धाँधली भएको आरोप लगाउँदै आउनुभएको छ । ५ वटा प्रान्तमा धाँधली भन्दै उहाँले पुनः निर्वाचनको माग गर्नु भएको थियो ।
तर, निर्वाचन आयोगले भने कुनै प्रकारको धाँधली नभएको भन्दै सुविआन्तोको माग खारेज गरिदिएको थियो। अवस्था थप बिग्रिन नदिन जकार्तामा मात्रै ४० हजार सुरक्षाकर्मी परिचालन गरिएको छ।
