भारत, १८ वैशाख । भारतको महाराष्ट्र राज्यमा माओवादीहरूले विशेष सुरक्षा दलमाथि आक्रमण गर्दा १६ जना सुरक्षाकर्मिको मृत्यु भएको र १० भन्दा बढी घाइते भएका छन् ।
महाराष्ट्रको गढचिरौलीमा भारतीय माओवादीको गतिविधि बढेको र उनीहरुको कारबाहीका क्रममा त्यहाँ दुई दर्जनभन्दा बढी गाडीहरुमा आगजनी भएको सूचना पाएपछि नियन्त्रणका लागि गएको प्रहरी टोलीमाथि माओवादीले आक्रमण गरेको हो ।
माओवादी लडाकुले गढचिरौलीमा सुरक्षाकर्मीलाई लक्षित गरी आक्रमण तथा बिस्फोट गराउँदा उनीहरु मारिएका हुन् । बुधबार दिउँसो पौने १ बजे सुरक्षाकर्मीलाई लक्षित गरी आक्रमण गरिएको जनाइएको छ । घटनामा अरु १० जना घाइते भएका छन् । माओवादी लडाकुले आईईडी बिस्फोट गराएको जनाइएको छ ।
बिस्फोटपछि सुरक्षाकर्मी र माओवादी लडाकुबीच गोली हानाहान भएको भारतीय सञ्चारमाध्यमहरुले जनाएका छन् ।
उक्त आक्रमणको क्रममा दोहोरो गोली चलेपनि माओवादी तर्फको क्षतिको विषयमा भने अझै कुनै जानकारी प्राप्त हुन सकेको छैन । श्रोतका अनुसार आक्रमणमा माओवादी पक्षबाट गोलाबारी भएको थियो ।
महाराष्ट्रको गढचिरौली माओवादीको अत्यन्त प्रभावित तथा आधार क्षेत्रको रुपमा रहदैँ आएको छ । त्यहाँ माओवादीका आन्तरिक गतिविधिहरु अन्य क्षेत्रको भन्दा बढी हुने गरेको बताइन्छ ।
