काठमाडौं, १२ पुस ।
अमेरिकी राष्ट्रपति डोनाल्ड ट्रम्पले क्रिसमसको अवसर पारेर इराकमा रहेका अमेरिकी सैनिकसँग भेटवार्ता गरेका छन् ।
पूर्व निर्धारित कार्यक्रमविना नै क्रिसमसको दिन अबेर साँझ इराक पुगेका राष्ट्रपति ट्रम्पले अमेरिकी शैनिकहरुसँग झण्डै तीन घण्टा बिताएका थिए । सो क्रममा उनले इराकमा कार्यरत सैनिकले गरेको सेवा, सफलता र बलिदानको लागि धन्यबाद दिन गएको ह्वाइट हाउसले जनाएको छ ।
त्यसक्रममा ट्रम्पले इराकबाट अमेरिकी सैनिक हटाउने कुनै योजना नभएको समेत प्रतिकृया दिएको समाचार संस्था रोयटर्सले भनेको छ ।
मध्यपूर्वको रणनीतिमा मतभेद भएर केही दिन अघि रक्षामन्त्री जेम्स म्याटिसले राजीनामा दिएलगत्तै राष्ट्रपति ट्रम्पको यो भ्रमण भएको हो ।
ट्रम्पको साथमा अमेरिकाकी प्रथम महिला मेलानिया ट्रम्प र अमेरिकाका राष्ट्रिय सुरक्षा सल्लाहाकार जोन बोल्टन पनि थिए ।
त्यस क्रममा सैनिकहरुले राष्ट्रपति ट्रम्पसँग सेल्फी पनि खिचेका थिए । इराकमा अहिले पनि कार्यरत अमेरिकाका करिव ५ हजार सैनिकले इराक सरकारलाई इस्लामिक स्टेटविरुद्धको लडाइँमा सहयोग गरिरहेका छन् ।
