काठमाडौं, वैशाख ७ ।
नेकपा माओवादी केन्द्रका अध्यक्ष पुष्पकमल दाहाल प्रचण्डले एमालेसँगको पार्टी एकताबाट पछि हट्न नसकिने बताउनु भएको छ । पार्टी एकताका प्राविधिक विषय गम्भीर ढंगले टुंग्याइने उहाको भनाई छ ।
दाहालले एमाले अध्यक्ष केपी ओलीसँग पार्टी एकता बारे गम्भीर ढंगले वार्ता गर्ने बताउनु भयो । आफनै निवास खुमलटारमा आज केही निकटस्थ व्यक्तिहरुसँगको भेटमा उहाले एमाले नेताहरुको कार्यशैलीका कारण केही संशय पैदा गरेको बताउनु भयो ।
तर, समाधान गर्नै नसक्ने अवस्थामा भने नरहेको भन्दै उहाले द्विविधा र शंका निवारण गर्दै एकता गरिने आश्वासन दिनुभएको दाहालनिकट स्रोतले जनाएको हो ।
एमाले र माओवादीबीच यसअघि वैशाख ९ गते नेपाल कम्युनिस्ट पार्टी स्थापना दिवसका दिन एकता घोषणा गर्ने भनिए पनि त्यो टरेको छ ।
विवादित विषयमा सहमति खोज्नका लागि एकता संयोजन समितिको बैठकले दाहाल र ओलीलाई जिम्मा दिएपछि दुई नेताबीच बिहीबार वार्ता भएको थियो । सो वार्तामा सहमति जुट्न नसक्दा फेरि वार्ता हुन लागेको हो ।
एमाले र माओवादीबीच चुनाव चिह्न के राख्ने, विधानको प्रस्तावनामा जनयुद्ध शब्द राख्ने कि नराख्ने र केन्द्रीय समितिमा दुबै पार्टीका कति–कति सदस्य रहने भन्नेमा सहमति बनेको छैन ।
