चितवन, वैशाख ५ ।
नेकपा माओवादी केन्द्रका अध्यक्ष पुष्पकमल दाहालले आगामी वैशाख ९ गते नै पार्टी एकता गर्न सम्भव नभएको स्पष्ट पार्नु भएको छ ।
प्रेस चौतारी र प्रेस सेन्टर चितवनले आज भरतपुर विमानस्थलमा आयोजना गरेको पत्रकार सम्मेलनमा बोल्दै अध्यक्ष दाहालले तयारी पुरा नभएकाले वैशाख ९ गते पार्टी एकीकरण हुने सम्भावना टरेको बताउनु भएको हो ।
तर उहाँले नेकपा एमाले सग बैशाख महिना भित्रमा भने पार्टी एकता हुने बताउनु भयो । उहाँले सञ्चारमाध्यममा आएजस्तै चुनाव चिन्ह, सिद्धान्त र पदका विषयमा टुंगो लागि नसकेको स्पष्ट पार्नु भएको हो ।
उहाँले एकीकृत पार्टीको विधानमा जनयुद्ध र जनआन्दोलनलाई कसरी प्रस्तुत गर्ने, निर्वाचन चिन्ह के राख्ने र एकताको मोडालिटी के हुने भन्ने विषयमा प्रधानमन्त्री केपी शर्मा ओली र आफूबीच भोलि नै गम्भिर रुपमा छलफल हुने बताउनु भएको छ ।
पार्टी एकता हुँदैन कि भन्ने आशंका नगर्न सबैलाई आग्रह गर्दै दाहालले वैशाख महिनाभित्रै एकता टुंगिने दाबी गर्नुभयो ।
