काठमाडौं, चैत २६ ।
माओवादी केन्द्रबाट मन्त्री भएकाहरुले प्रधानमन्त्री केपी ओली एकलौटी ढंगले अघि बढेको भन्दै गुनासो गरेका छन् ।
पार्टी अध्यक्ष पुष्पकमल दाहाललाई सामूहिक भेटेर मन्त्रीहरुले प्रधानमन्त्री ओलीको व्यवहार ‘चित्त नबुझेको’ भन्दै यसबिषयमा पार्टीगत रुपमा छलफल गर्न पनि आग्रह गरेका थिए ।
उनीहरुले आफ्नै मन्त्रालयमा सचिव सरुवा गर्दा पनि आफूहरुलाई थाहै नदिइएको भन्दै गुनासो गरेका थिए । प्रधानमन्त्रीय प्रणाली भए पनि गठबन्धन सरकार भएकाले सामूहिक नेतृत्वबाट चल्नुपर्नेमा उनीहरुको भनाइ थियो ।
प्रधानमन्त्री ओलीले भारत भ्रमणमा जानुअघि विभिन्न मन्त्रालयका ३० सचिवको सरुवा गर्नुभएको थियो ।
प्रवक्ता पम्फा भुसालले सचिव सरुवा गर्दा मन्त्रीहरुले पनि थाहा नपाएको गुनासो आएको बताउनु भयो ।
मन्त्रीहरुले सचिव सरुवाका विषयमा प्रधानमन्त्री ओलीसँग छलफल गर्न नेतृत्वको ध्यानाकर्षण गराएको पनि भुषालले बताउनु भयो ।
भेटमा अध्यक्ष दाहाललाई मन्त्रीहरुले आफूहरुले अहिलेसम्म गरेका कामबारे जानकारी गराएका थिए ।
मन्त्रीहरुको गुनासो सुनेपछि अध्यक्ष दाहालले पनि परिणाम ल्याउने गरी काम गर्न मन्त्रीहरुलाई निर्देशन दिनुभएके थियो ।
ओली भारत भ्रमणमा गएको बेला गृहमन्त्री रामबहादुर थापाले पनि सचिव सरुवाबारे आफ्ना पार्टीका मन्त्रीहरुसँग छलफल नै गर्नुभएको थियो ।
