काठमाडौ ,२४ चैत्र ।
भारतको तीन दिने राजकीय भ्रमणमा रहनु भएका प्रधानमन्त्री केपी शर्मा ओलीले भारतका राष्ट्रपति रामनाथ कोविन्दसँग शिष्टाचार भेटवार्ता गर्नुभएको छ ।
नयाँदिल्लीस्थित राष्ट्रपति भवनमा भएको भेटवार्तामा राष्ट्रपति कोविन्दले शान्त, समृद्ध नेपाल भारतको चाहना भएको बताएका बताउनुभएको छ ।
नेपालको प्रधानमन्त्री पदमा निर्वा्चित भएकोमा प्रधानमन्त्री ओलीलाई बधाई दिदै राष्ट्रपति कोविन्दले नेपालको विकास हेर्ने चाहना रहेको धारणा व्यक्त गर्नुभएको थियो ।
उहाँहरुबीच द्विपक्षीय चासो र हितका विषयमा पनि छलफल भएको परराष्ट्र सचिव शंकरदास बैरागीले जानकारी दिनुभयो । सो क्रममा राष्ट्रपति कोविन्दले नेपालका समकक्षी बिद्या देवि भण्डारीलाई भारत भ्रमणको निम्तो समेत दिनुभएको सचिव बैरागीले बताउनु भयो ।
यसअघि आजै राष्ट्रपति भवनमा प्रधानमन्त्री ओलीलाई गार्ड अफ अनरबाट सम्मान गरिएको छ । सम्मान ग्रहण लगत्तै सन्चारकर्मीसँगको संक्षिप्त कुराकानीमा उहाँले दुई देशबीचको मित्रवत सम्बन्ध जनचाहना अनुसार अघि बढ्ने बताउनु भयो ।
यस क्षेत्रको जनताको जीवनस्तर उकास्न मिलेर काम गर्नुपर्ने बताउँदै प्रधानमन्त्री ओलीले सरकार र जनस्तरमा विद्यमान दुई देशबीचको मित्रवत् सम्बन्ध विकास र विस्तारमा योगदान र्पुयाउन आफू भारत भ्रमणमा आएको बताउनुभयो ।
भ्रमणका अवसरमा भारत सरकार र निजी क्षेत्रसँग छलफल भइरहेको बताउँदै उहाँले आफ्नो भ्रमण फलदायी हुने विश्वास व्यक्त गर्नुभयो । भारतको राष्ट्रपति भवनमा आयोजित विशेष समारोहमा भारत सरकारका तर्फबाट प्रधानमन्त्री ओलीलाई सम्मान दिइएको हो ।
यसैबीच प्रधानमन्त्री ओली र समकक्षी नरेन्द्र मोदीसँग आजै औपचारिक भेटवार्ता हुदैछ । यसअघि हिजै वान टु वान वार्ता गर्नुभएका दुई प्रधानमन्त्रीले आज दुवै देशका प्रतिनिधिमण्डलसहित छलफल गर्न लाग्नु भएको हो ।
दुई प्रधानमन्त्रीबीच हिजो भएको वार्ता विकासमा साझेदारी गर्ने सम्बन्धमा छलफल भएको र आज यिनै विषयमा थप छलफल हुने जनाइएको छ ।
वार्तामा नेपालका तर्फबाट प्रधानमन्त्री ओलीसहित उहाँका मुख्य राजनीतिक सल्लाहकार विष्णु रिमाल, परराष्ट्रमन्त्री प्रदीप ज्ञवाली, उद्योग बाणिज्य तथा आपूर्ति मन्त्री मातृका यादव, मुख्य सचिव लोकदर्शन रेग्मी लगायत सहभागी हुनुहुनेछ ।
भारतीय प्रधानमन्त्रीसँगको भेटमा नेपालले यसअघिका सम्झौताको कार्यान्वयनको विषयलाई जोड दिने तयारी गरेको छ । त्यसअघि उहाँले महात्मा गान्धीको समाधिस्थल राजघाटमा पुगेर माल्यार्पण गर्ने कार्यक्रम छ ।
