काठमाडौ ,२० चैत्र ।
प्रधानमन्त्री केपी शर्मा ओलीले आज संसदमा विषेश सम्बोधन गर्नुहुने भएको छ । भारत भ्रमणका क्रममा उठाइने एजेण्डा तथा दुई मुलुकबीच हुने सहमतिको विषयमा प्रधानमन्त्री ओलीले सदनमा जानकारी गराउन लाग्नुभएको हो ।
प्रधानमन्त्रीले वैदेशिक भ्रमण गर्नुअघि सदनलाई जानकारी गराउने परम्परा अनुरुप प्रधानमन्त्रीले आफ्नो भ्रमणका विषयमा प्रतिनिधिसभा बैठकमा सम्बोधन गर्ने तयारी भएको संघिय संसदको सचिवालयले जनाएको छ ।
संसद्का अघिल्ला बैठकहरूमा पाकिस्तानका प्रधानमन्त्रीको नेपाल भ्रमणको विषयमा प्रश्न उठेकाले त्यस विषयमा समेत उहाँले सदनलाई जानकारी गराउन लाग्नु भएको प्रधानमन्त्रीका प्रेस संयोजक चेतन अधिकारीले जानकारी दिनुभयो ।
प्रतिनिधि सभाको बैठक दिउँसो एक बजे तयारी भएको छ । प्रधानमन्त्री ओलीले सरकार सम्हालेपछि पहिलो विदेश भ्रमणका रूपमा आगामी चैत २३ देखि भारतको तीनदिने राजकीय भ्रमण गर्दै हुनुहुन्छ ।
प्रधानमन्त्रीको सम्बोधनपछि आजै अघिल्ला सरकारले अध्यादेश मार्फत पारित गरेका दुई विधेयकलाई स्वीकृत गर्ने तयारी समेत गरेको छ । गृहमन्त्री रामबहादुर थापाले ‘राष्ट्रिय सभा सदस्य निर्वाचन अध्यादेश स्वीकृत गरियोस् भनी प्रस्ताव पेस गर्ने कार्यसूची रहेको संसद् सचिवालयले जनाएको छ ।
यस्तै राष्ट्रिय सभाको बैठक पनि आजै बस्दैछ । अपरान्ह ४ बजे बस्ने बैठकमा राष्ट्रिय चिकित्सा शिक्षा अध्यादेश स्वीकृत गर्ने कार्यक्रम रहेको संघीय संसद सचिवालयका सहप्रवक्ता केशव अर्यालले जानकारी दिनुभयो ।
आजै संघीय संसदको पहिलो अधिवेशन अन्त्य हुने सम्भावना रहेको सचिवालय स्रोतले जनाएको छ ।
