सप्तरी , १७ चैत ।
संघीय समाजवादी फोरम नेपालका अध्यक्ष उपेन्द्र यादवले २ नम्बर प्रदेशको विकासका लागि केन्द्रबाट समुचित बजेट नआए प्रदेशबाट केन्द्रीय सरकारलाई जाने बजेट रोक्ने चेतावनी दिनु भएको छ ।
मुस्लिम समाज नेपालद्धारा आज सप्तरीको राजविराजस्थित रहमतपुरमा आयोजित सम्मान कार्यक्रममा यादवले केन्द्रीय शासनमा रहेकाहरु २ नम्बर प्रदेश प्रति पूर्वाग्रही रहेको आरोप लगाउनु भयो ।
२ नम्बर प्रदेशको विकासका लागि केन्द्र सरकारले उचित बजेट दिन आनाकानी गरिरहेको भन्दै उहाँले केन्द्र सरकारले विशेष प्याकेजको ब्यवस्था गर्नुपर्ने बताउनुभयो ।
कार्यक्रममा २ नम्बर प्रदेशका मुख्यमन्त्री लालबावु राउतले २ नम्बर प्रदेश गरिब, बेरोजगारी, अशिक्षा, पिछडापन लगायतका समस्याले ग्रसित रहेको बताउनुभयो ।
उहाँले यो प्रदेशलाई सुशासित, समृद्ध र विकसित बनाउनु चुनौती र अवसर दुबै भएको बताउनुभयो ।
प्रदेशका भूमि ब्यवस्थापन तथा कृषि मन्त्री शैलेन्द्रप्रसाद साहले जनसंख्याका आधारमा सबैको प्रतिनिधित्वको ग्यारेन्टीका लागि प्रदेश सरकार क्रियाशिल रहेको बताउनुभयो ।
कार्यक्रममा मुस्लिम समाज नेपाल सप्तरीले यादव, राउत र साहलाई सम्मान समेत गरेको थियो ।
