काठमाडौँ, १ चैत ।
गृहमन्त्री रामबहादुर थापाले मानव तस्करी नियन्त्रण र भुटानी शरणार्थी एंव तिब्बती शरणार्थीको व्यवस्थापनका विषयमा मन्त्रालयले अध्ययन गरिरहेको बताउनु भएको छ ।
नेपालका लागि संयुक्त राज्य अमेरिकाका राजदूत अलाइन टेप्लिजसँग आज भएको शिष्टाचार भेटवार्ताका क्रममा गृहमन्त्री थापाले मानव तस्करी अहिले जटिल समस्याको रुपमा देखा परेकाले यसको नियन्त्रणका लागी सरकारले ठोस निती तर्जुमा गर्ने बताउनु भयो ।
भेटवार्ताका क्रममा टेप्लिजले अध्यागमन सुरक्षासम्बन्धी विषयमा अमेरिकी सरकारले सहयोग गर्न चाहेको तथा अमेरिकी नागरिकबाट नेपाल सरकारले लिने प्रवेशाज्ञा शुल्क पुनरावलोकन हुनुपर्नेलगायतका विषयमा पनि जिज्ञासा राख्नुभएको थियो ।
गृहमन्त्रालयमा भएको भेटमा उहाँहरुबीच दुई देशको सम्बन्ध, आपसी सहकार्य र सहयोगका क्षेत्रमा केन्द्रित रहेर छलफल भएको थियो ।
भेटमा गृहमन्त्री थापाले नेपाल र अमेरिकाबीच ७० वर्षअघिदेखि कूटनीतिक सम्बन्ध रहिआएको बताउँदै यो अवधिमा दुई देशबीचको सम्बन्ध अझ प्रगाढ बन्दै गएको बताउनुभयो ।
उहाँले नेपालको विकास तथा सुरक्षा निकायको तालीम र भौतिक संरचना निर्माणलगायतका क्षेत्रमा अमेरिकाले गर्दै आएको सहयोगप्रति धन्यवाद दिनुभयो ।
अमेरिकी राजदूत टेप्लिज्ले थापालाई गृहमन्त्रालयको जिम्मेवारी सम्हालेकोमा बधाई पनि दिनुभएको थियो ।
