काठमाडौं, फागुन १६ ।
नेपाली कांग्रेसका सभापति शेरबहादुर देउवाले संसदीय दलको नेता आफैं बन्ने घोषणा गर्नुभएको छ ।
नेपाली कांग्रेसका महामन्त्री डा. शशांक कोइरालाले होली पर्वको अवसर पारेर आज आफ्नै निवास टोखामा आयोजना गरेको चियापानमा देउवाले पार्टी सभापति आफू भएकाले संसदीय दलको नेता पनि आफैं बन्ने दाबी गर्नुभएको हो ।
उहाँले फागुन २१ गते हुने संसदीय दलको निर्वाचनमा आफूले उम्मेदवारी दिने घोषणा गर्नुभयो ।
संसदीय दलको नेतामा आफ्नो उम्मेदवारी दाबी गर्दै आएका अर्का नेता तथा पूर्वमहामन्त्री प्रकाशमान सिंहले पनि सर्वसम्मतको अवस्था नरहेको भन्दै संसदीय दलमा आफ्नो उम्मेदवारी दाबी रहेको बताउनु भयो ।
उहाँले नेतृत्वको कमजोरीले पार्टीको अवस्था खुम्चेको भन्दै अब संसदीय दलको नेतृत्व आफूले लिने बताउनु भयो ।
नेपाली कांग्रेसको आगामी रणनीति तय गर्न र संसदीय दलको नेतामा सर्वसम्मतको वातावरण बनाउन आयोजना गरिएको चियापानमा महामन्त्री कोइरालाले भने सर्वसम्मत् नेता चयन गर्न आफ्नो भूमिका हुने बताउनु भयो ।
उहाँले संसदीय दलको नेतामा सर्वसम्मत् भए आफूपनि इच्छुक रहेको बताउनुभयो ।
महामन्त्री कोइरालाले राखेको चियापान कार्यक्रममा वरिष्ठ नेता रामचन्द्र पौडेललगायतका अन्य नेता पनि सहभागीता थियो ।
