काठमाडौँ, ७ फागुन ।
एमालेसँगको पार्टी एकता र सरकारमा सहभागीताका बिषयमा आज नेकपा माओवादी केन्द्रले आन्तरिक छलफल गरेको छ ।
दुई पार्टीबीचको बैचारिक विवादलाई महाधिवेशनबाट टुङग्याउनेबारे शीर्ष नेताहरुबीच सहमती भएपछि पार्टी अध्यक्ष पुष्पकमल दाहाल‘प्रचण्ड’ले आज पार्टीका शीर्ष नेताहरुसँग आन्तरिक छलफल गर्नुभएको हो ।
अध्यक्ष दाहालको निवास खुमलटारमा आज भएको अनौपचारिक छलफलमा एकता प्रक्रियालाई निष्कर्षमा पु¥याउने गरी कुराकानी भइरहेको शीर्ष नेतालाई जानकारी गराउनुभएको थियो । माओवादी केन्द्रका नेता जनार्दन शर्माका अनुसार पार्टी एकतालाई निष्कर्षमा पु¥याउने गरी कुराकानी भइरहेको छ ।
आजको बैठकमा अध्यक्ष प्रचण्डले प्रधानमन्त्री केपी ओलीसँग भएको सहमतिबारे ब्रिफिङ गर्नुभएको थियो ।
उक्त बैठकले पार्टी एकता संयोजन समितिको बैठकले एकता सम्बन्धी आधारभूत कुरामा सहमति जनाएमा सरकारमा जाने निर्णय पनि गरेको छ ।
जनताको बहुदलीय जनबाद, माओवाद, जनयुद्ध जस्ता विषयमा बिबाद हुँदा एकता अन्यौलमा परेपछि सरकारमा पनि सहभागी नभएको माओवादी उक्त बिषय महाधिवेशनबाट टुङग्याउने सहमती भएपछि सरकारमा जान तयार भएको हो ।
एमालेले झिकेको नयाँ बिवाद छोडेर पुरानै सहमति अनुसार अघि बढे समस्या समाधान हुने बैठकमा सहभागी नेता देव गुरुङले जानकारी दिनुभयो ।
यसअघि एमालेले जनताको बहुदलीय जनबाद अहिलेनै स्वकार गरे मात्र पार्टी एकता हुने सर्त अघि सारेपछि दुई पाटीबीचको एकता प्रकृया पछि धकेलिएको थियो । अनौपचारिक तथा एक्ला एक्लैका छलफलमा एमाले एकताका लागि तयार भएपनि पार्टी एकता संयोजन समितिको बैठकमा भने पछि हटेको माओवादीको दावी छ ।
एकता संयोजन समितिको बैठकले आवश्यक निर्णय गरेपछि मात्रै सरकारमा सहभागि हुने माओवादीका मन्त्रिहरुका विषयमा छलफल गर्ने पार्टी प्रवत्ता पम्फा भुषालले जानकारी दिनुभयो ।
एकता प्रक्रियाका कारण सरकार बिस्तारमा ढिलाई भएकोमा आज साझ सम्म सहमति भए भोली सरकार विस्तार गर्नेसम्मको तयारी छ ।
