काठमाडौँ, ७ फागुन ।
प्रधानमन्त्री केपी शर्मा ओलीले मुलुकमा राजनीतिक स्थिरता, विकास र समृद्धिको सपना साकार पार्ने युगको प्रारम्भ भएको बताउनुभएको छ ।
अठसट्ठिऔँ राष्ट्रिय प्रजातन्त्र दिवसका अवसरमा टुँडिखेलमा आज आयोजित विशेष समारोहलाई सम्बोधन गर्दै प्रधानमन्त्री ओलीले सबै तहको संयुक्त प्रयासबाट न्यायपूर्ण सामाजिक व्यवस्था स्थापना गर्ने र आर्थिक विकासमार्फत समृद्धको लक्ष्य हासिल गर्ने अवसर आरम्भ भएको बताउनुभयो ।
दशकौँदेखिको राज्यका केन्द्रीकृत संरचनालाई संघीयताको ढाँचामा ७ प्रदेश, ७५३ स्थानीय तहसहितको शासकीय पद्धतिमा ढाल्ने कार्य अगाडि बढेको चर्चा गर्दै उहाँले तीनवटै तहका सरकारले आ–आफ्ना अधिकारका सीमा र सम्बन्धमा रही समन्वयात्मक तवरबाट शासन सञ्चालन गर्ने नयाँ अध्याय पनि सुरु भएको धारणा राख्नुभयो ।
प्रधानमन्त्री ओलीले जनतामा निहित सार्वभौमसत्ताको सम्मान, राष्ट्रिय एकता एवं हितको रक्षा, कानूनी शासनको सुदृढीकरण, सशासन, स्थिरता, विकास र समृद्धि अबको कार्य्दिशा रहने बताउनुभयो ।
आ–आफ्नो कर्म क्षेत्रबाट उठेर देश विकासमा लाग्न आह्वान गर्दै उहाँले समयसापेक्ष संविधानको कार्यान्वयन निरपेक्ष विकासबाट सम्भव नरहने बताउनु भयो ।
राजनीतिक परिवर्तनको युगबाट मुलुकको आर्थिक परिवर्तन, समृद्धि, सुशासन र सामाजिक न्यायको युगको यात्रा सँगसँगै शुभारम्भ गर्न हातेमालोका लागि उहाँको अपिल छ ।
प्रधानमन्त्री ओलीले जनताको सङ्घर्षबाट निरङ्कुश जहानियाँ शासनको अन्त्य भई प्रजातन्त्र प्राप्त भएको ऐतिहासिक दिनमा शहिदले देखाएको बाटोमा हिड्नु नै उनीहरुले गरेको बलिदानको उचित कदर हुने धारणा राख्नुभयो ।
उक्त समारोहमा प्रधानमन्त्री सहित राष्ट्रपति विद्यादेवी भण्डारी , उपराष्ट्रपति नन्दबहादुर पुन, प्रधानन्यायाधीश गोपाल पराजुली , मन्त्रीहरु तथा उच्च पदस्थ अधिकारीहरुको सहभागीता रहेको थियो ।
सोही अवसरमा नेपाली सेनाका दुईवटा हेलिकप्टरले पुष्पवृष्टि, तीनवटै सुरक्षा निकायबाट आकर्षक मार्चपास, उपत्यकाभित्रका विभिन्न स्थानीय तहले आ–आफ्ना सांस्कृतिक झल्किने झाँकीसमेत प्रस्तुत गरेका थिए ।
