काठमाडौं ,७ फागुन ।
पार्टी एकता प्रक्रियालाई निश्कर्षमा र्पुयाउने कसरतमा रहेका एमाले र माओवादी केन्द्रबीच आज पनि छलफल हुँदैछ ।
दुई पार्टीबीचको बैचारिक विवादलाई महाधिवेशनबाट टुङग्याउने सहमती भएपनि सरकार बिस्तार लगायतका थप बिषयमा छलफल गर्न आज पनि दुई अध्यक्ष बीच वार्ता हुन लागेको हो ।
एकता संयोजन समितिको कार्यदल संयोजक सुभास नेम्वाङले सरकार बिस्तार र पार्टी एकताबारे केपी ओली र प्रचण्डबीच आज छलफल हुने जानकारी दिनुभयो ।
दुई अध्यक्षबीच छुट्टै भेटवार्तापछि मात्रै एकता संयोजन समितिको बैठक बस्नेछ । एकता प्रक्रियाका कारण सरकार बिस्तारमा ढिलाई भएको भन्दै संयोजक नेम्वाङले दुई अध्यक्षबीच आज सहमति भए भोलीसम्ममा सरकार विस्तार हुने जानकारी दिनुभयो ।
नेताहरुको पदीय व्यवस्थापन र बैचारिक एकता हुन नसक्दा माओवादीले सरकारमा जाने मन्त्रीहरुको टुङ्गो लगाएको छैन ।
