काठमाडौ ३ फागुन ।
नवनियुक्त प्रधानमन्त्री केपी शर्मा ओलीले नेपालको ४१ औ प्रधानमन्त्रीको रुपमा आज पद तथा गोपनियताको सपथ ग्रहण गर्नुभएको छ ।
राष्ट्रपति विद्यादेवी भण्डारीले ओलीलाई नेपालको संविधानबमोजिम आज साँझ पद तथा गोपनीयताका शपथ गराउनुभएको हो ।
राष्ट्रपति कार्यालय शीतल निवासमा साँझ ५ बजे आयोजित विशेष समारोहमा उहाँले शपथ लिनुभयो । समारोहमा उपराष्ट्रपति, प्रधानन्यायाधीश, निवर्तमान प्रधानमन्त्री शेरबहादुर देउवालगायतको सहभागिता थियो ।
कांग्रेस सभापति शेरबहादुर देउवाले प्रधानमन्त्रीबाट राजनीनामा दिएको केही बेरपछि नै राष्ट्रपतिले प्रतिनिधिसभामा बुहमत प्राप्त दल एमालेका अध्यक्ष ओलीलाई आज बिहान प्रधानमन्त्री नियुक्त गर्नुभएको थियो । भण्डारीले संविधानको धारा ७३ को उपधारा २ बमोजिम प्रधानमन्त्री नियुक्त गर्नुभएको हो ।
प्रतिनिधिसभामा एमालेको १ सय २१ र माओवादी केन्द्रको ५३ गरी १ सय ७४ सिट छ । २ सय ७५ सदस्यीय प्रतिनिधिसभामा सरकार गठनका लागि १ सय ३८ सिट आवश्यक पर्छ ।
प्रतिनिधिसभामा वाम गठबन्धन दुई तिहाई नजिक छ । नवनियुक्त प्रधानमन्त्री ओलीले एक महिनाभित्र संसदमा विश्वासको मत लिनु पर्नेछ ।
यसअघि एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्ड सहितका नेताहरु आज बिहान शितल निवास पुगेर ओलीलाई प्रधानमन्त्री नियुक्त गर्न आग्रह सहितको पत्र राष्ट्रपति भण्डारीलाई बुझाएका थिए ।
संसदमा बहुमत प्राप्त दलको नेतालाई राष्ट्रपतिले प्रधानमन्त्री नियुक्त गर्न सक्ने संवैधानिक व्यवस्था छ ।
प्रधानमन्त्रीमा नियुक्त भएलगत्तै एमालेले ओलीलाई पार्टीको संसदीय दलको नेतामा चयन गरेको छ ।
एमाले केन्द्रीय कार्यालयमा आज अध्यक्ष ओलीलाई पार्टी नेता माधवकुमार नेपालले संसदीय दलको नेतामा प्रस्ताव गरेपछि ओली सर्वसम्मत रुपमा नेता चयन हुनुभएको हो ।
